Presidenti i Barcelona, Joan Laporta, sulmoi drejtpërdrejt FIFA-n për dëmtimin që pësoi Raphinha gjatë miqësores kundër Francës, ndërsa luante për Brazilin. Ky aksident do t’i kushtojë shumë trajnerit Hansi Flick, pasi humbet një nga lojtarët kryesorë sulmues në një moment vendimtar të sezonit.
“Fakti që një nga lojtarët më të mirë në skuadër dëmtohet në një miqësore midis Francës dhe Brazilit luajtur në Amerikë na bën shumë të zemëruar“, deklaroi presidenti i klubit katalanas.
“Nuk mund t’ia vësh fajin lojtarit sepse ai është një profesionist që jep gjithçka për vendin e tij dhe kjo është normale. Por FIFA duhet të krijojë një kalendar ndërkombëtar që merr në konsideratë garat me të cilat përballen klubet më të rëndësishme“, tha më tej Laporta.
“Në këtë pikë të sezonit, ne po luajmë për jetën tonë. Ne klubet kemi pak pushtet. Nuk gjejmë kurrë një mënyrë. Është e komplikuar”, deklaroi më tej presidenti i Barcelonës lidhur me hartimin e numrit të ndeshjeve me të cilat do të përballet secila skuadër gjatë sezonit.
“Është shumë e komplikuar të zgjidhet kjo çështje. Është e jashtëzakonshme, por është një diskutim historik. Në rolin tim të parë, ne themeluam G-14 sepse një nga çështjet ishte kalendari i garave, dhe ne klubet donim të drejtën për të marrë pjesë në hartimin e kalendarit ndërkombëtar të ekipeve kombëtare”, kujtoi Laporta.
The post Laporta shpërthen ndaj FIFA pas dëmtimit të Raphinha: S’ka koordinim me kalendarin, ne luajmë me jetën tonë appeared first on Telesport.
