Nënkryetarja e Partisë Demokratike të Kosovës, Vlora Çitaku e quajti me shaka “të nxehtë” situatën politike në vend, një ditë pas aktgjykimit të Gjykatës Kushtetuese që i dha afat shtesë Kuvendit të Kosovës për zgjedhjen e presidentit.
Duke biseduar me gazetarë para fillimit të deklarimit të saj menjëherë pas përfundimit të mbledhjes së Kryesisë dhe të Grupit Parlamentar të PDK-së të enjten, Çitaku i pyeti gazetarët sesi ndiheshin.
Kur gazetarët u ankuan për motin e ftohtë, ajo ia ktheu me buzën në gaz: “Situata në Kosovë është e nxehtë..”.
Pastaj, Çitaku tha se mbledhja në PDK ka përfunduar me një vendim: thirrjen e këshillit drejtues partiak.
“Vendimi ynë sot është që do të thërrasim mbledhjen e këshillit drejtues brenda pak ditësh ku do t’i marrim vendimet për veprimet e ardhshme”, tha ajo.
“Siç jemi deklaruar edhe dje, PDK i respekton vendimet e Gjykatës Kushtetuese”, u shpreh Çitaku.
Ajo tha se respektimi i vendimeve të Gjykatës Kushtetues “nuk diskutohen asnjëherë” nga PDK-ja.
