Pranë mesnatës, Joan Laporta u shfaq në “Auditori 1899”, i shoqëruar nga drejtuesit e kandidaturës së tij, pasi u konfirmua fitues i zgjedhjeve presidenciale të Barcelonës. Në skenë e prisnin Josep Cubells dhe Rafa Yuste, ndërsa Laporta doli së bashku me gjithë anëtarët e bordit dhe maskotën e klubit, Cat.
“Ky rezultat është bindës dhe na jep shumë forcë, aq shumë sa na bën të pandalshëm. Askush nuk do të na ndalë”, – deklaroi Laporta mes duartrokitjeve dhe thirrjeve “president, president”. Ai falënderoi anëtarët e klubit për pjesëmarrjen: “Faleminderit këtij klubi të mrekullueshëm, Barçës, ku anëtarët ende votojnë se kush do t’i përfaqësojë. Ishte një festë e demokracisë dhe e barcelonizmit”.
Laporta vlerësoi gjithashtu punën e drejtuesve dhe stafit të klubit, si dhe përmendi trajnerin Hansi Flick e drejtorin sportiv Deco. Ai theksoi se shumica e anëtarëve zgjodhën unitetin: “Na kanë dhënë mbështetje për të vazhduar projektin; përfundimin e ‘Spotify Camp Nou’, ndërtimin e ‘Palau’ të ri dhe forcimin e skuadrës”.
Në fund tha: “Ky rezultat na jep një forcë të jashtëzakonshme. Do të vazhdojmë ta mbrojmë Barçën kundër gjithçkaje dhe kujtdo. Na presin vite emocionuese”.
The post Laporta rizgjidhet president: Ky rezultat është shumë bindës, na bën të pandalshëm appeared first on Telesport.
