I vërshëllyer nga tifozët në të gjithë Italinë për simulimin e një kontakti me Pierre Kalulu, i cili më pas u ndëshkua me karton të kuq në ndeshjen kundër Juventusit, Bastoni arriti ta pranonte publikisht gabimin e tij, duke marrë përgjegjësinë.
Për këtë arsye, presidenti i Këshillit Rajonal të Lombardisë, Federico Romani, ka propozuar mbrojtësin e Interit dhe të kombëtares italiane për çmimin “Rosa Camuna”, nderimi më i lartë i rajonit, për një qëndrim “jo të zakonshëm dhe jo të pritshëm, që dëshmon respekt për lojën, për kundërshtarët dhe tifozët”.
Kandidatura e Romani është mbështetur edhe nga këshilltari rajonal Pietro Bussolati (PD), president i “Inter Club” në “Palazzo Pirelli”. Sipas tyre, episode si ai i 14 shkurtit në Inter-Juventus ndodhin shpesh në futboll, pa të njëjtën jehonë: “Reagimi i Bastonit përfaqëson një shembull pozitiv se si gabimi mund të kthehet në mundësi për përgjegjësi dhe rritje”.
“Rosa Camuna”, e krijuar më 1996 nga Rajoni i Lombardisë, është çmimi më i lartë për merita civile, ekonomike, kulturore dhe sportive, që i jepet çdo vit deri në pesë personave ose organizatave.
The post Bastoni, kandidat për “Rosa Camuna” të Lombardisë pas simulimit kundër Juventusit appeared first on Telesport.
