Komiteti i Rajoneve i Bashkimit Evropian (CoR) ka vendosur që në dokumentet dhe komunikimet e tij zyrtare të mos përdorë më emërtimin “Kosovë” me asteriks (*), por vetëm “Kosovë”, duke shënuar një zhvillim të rëndësishëm institucional për vendin në nivel evropian.
Vendimi është bërë i ditur në opinionin më të fundit të këtij institucioni mbi Paketën e Zgjerimit të vitit 2025 të Bashkimi Evropian për Ballkanin Perëndimor dhe Turqinë. Me këtë hap, Komiteti i Rajoneve harmonizon qëndrimin e tij me atë të Parlamenti Evropian, i cili tashmë përdor emërtimin “Kosovë” pa asteriks në dokumentet e tij zyrtare.
Në të njëjtin opinion, Komiteti i Rajoneve i ka bërë thirrje Komisioni Evropian që të heqë masat e vendosura ndaj Kosova, duke theksuar se ato kanë ndikuar drejtpërdrejt në komunat dhe qytetarët e vendit.
Sipas këtij institucioni, zhvillimet e fundit në nivel lokal, përfshirë organizimin e zgjedhjeve lokale në vitin 2025 me pjesëmarrjen e të gjitha komuniteteve, kanë forcuar legjitimitetin e institucioneve komunale dhe funksionimin e demokracisë lokale në Kosovë.
Në opinion thuhet se rikthimi i pjesëmarrjes demokratike në nivel lokal e bën të panevojshme vazhdimin e masave të BE-së, të cilat fillimisht ishin vendosur për shkak të tensioneve politike në veri të vendit.
Një rol të rëndësishëm në ngritjen e kësaj çështjeje në institucionet evropiane ka luajtur edhe Asociacioni i Komunave të Kosovës (AKK). Përmes bashkëpunimit me Komitetin e Rajoneve dhe rrjete të ndryshme evropiane të qeverisjes lokale, AKK ka promovuar rolin e komunave në procesin e integrimit evropian dhe ka informuar partnerët evropianë për ndikimin e masave të BE-së në jetën e qytetarëve në nivel lokal.
Drejtori ekzekutiv i AKK-së, Sazan Ibrahimi, e ka cilësuar këtë zhvillim si një lajm shumë të rëndësishëm për Kosovën dhe për pushtetin lokal.
“Ky është një lajm shumë i mirë për Kosovën dhe për komunat tona. Është inkurajuese që institucionet evropiane po e njohin rolin e pushtetit lokal dhe ndikimin që vendimet e tyre kanë në jetën e qytetarëve në nivel lokal. Vendimi i Komitetit të Rajoneve për përdorimin e emrit ‘Kosovë’ pa asteriks është një zhvillim i rëndësishëm institucional në nivel evropian”, ka deklaruar ai.
Asociacioni i Komunave të Kosovës ka bërë të ditur se do të vazhdojë të angazhohet për forcimin e rolit të komunave në procesin e integrimit evropian të Kosovës dhe për përfaqësimin e interesave të pushtetit lokal në institucionet evropiane.
