Bodø/Glimt është bërë në mënyrë të pashmangshme “hirushja” e këtij edicioni të Champions League. Një rrugëtim i papritur për norvegjezët në kompeticionin më të rëndësishëm europian për klube, që ka vënë në vështirësi këdo. Shumë skuadra të mëdha si Manchester City, Inter, Atlético Madrid dhe Sporting CP janë mundur nga ekipi i trajnerit Kjetil Knutsen.
Vrapi, forca, saktësia dhe paparashikueshmëria janë baza e lojës së tyre, ndërsa në shtëpi kanë krijuar një fortesë ku fusha është pothuajse e pakalueshme. Megjithatë, këtë sezon në Champions, Bodø/Glimt ka treguar gjëra të mëdha edhe jashtë fushe, duke hedhur një hap drejt çerekfinaleve, pas fitores 3-0 ndaj Sportingut në ndeshjen e parë të 1/8-ave.
Për t’u përgatitur për këtë fazë, klubi ndryshoi plotësisht programin. Kampionati norvegjez mbyllet në dhjetor dhe skuadra e Knutsenit, pasi kaloi fazën fillestare të Champions-it, duhej të ndërtonte nga e para në janar një formë fizike “në mes të sezonit”, madje larg Norvegjisë.
Shpesh skuadra u zhvendos në Spanjë, në “Marbella Football Center”, për klimën e butë dhe kushtet e shkëlqyera. Këtë vit përgatitja u zhvillua në disa faza mes janarit dhe shkurtit. Knutsen punoi shumë te presioni i vazhdueshëm dhe tranzicionet e shpejta të 4-3-3-shit, ndërsa përgatitja fizike u plotësua me seanca intensive dhe teknologji monitorimi për të shmangur dëmtimet.
Skuadra zhvilloi edhe miqësore, mes tyre fitoren 4-1 ndaj Diósgyőri VTK dhe teste me klube suedeze e ndërkombëtare. Kjo përgatitje dha rezultat menjëherë në shkurt me kualifikimin pas fitores ndaj Interit. Më pas Bodø/Glimt u kthye në Norvegji, fitoi Kupën ndaj Molde FK dhe tani nis kampionatin më 14 mars kundër Sarpsborg 08.
The post Bodo/Glimt, 3 muaj përgatitje larg Norvegjisë. Kështu mundi City, Inter dhe Sporting në Champions appeared first on Telesport.
