Turqia ka thënë të hënën se çdo ndërhyrje e huaj në Iranin fqinj do të çonte në kriza më të mëdha në vend dhe në rajon, dhe ka bërë thirrje për negociata midis SHBA-së dhe Iranit për të zgjidhur problemet ekzistuese.
Irani po përballet me demonstratat e tij më të mëdha që nga viti 2022 dhe presidenti i SHBA-së, Donald Trump, ka kërcënuar të përfshihet nëse përdoret forcë kundër protestuesve.
Turqia, anëtare e NATO-s, nuk dëshiron të shohë kaos në Iran pavarësisht “problemeve të caktuara brenda shoqërisë dhe qeverisë iraniane”, ka thënë Omer Celik, zëdhënës i Partisë AK e cila është në pushtet në Turqi.
“Siç ka deklaruar presidenti iranian Pezeshkian, këto probleme duhet të zgjidhen përmes dinamikës së brendshme të shoqërisë iraniane dhe vullnetit kombëtar të Iranit”, ka thënë Celik në një konferencë për shtyp pas një takimi të partisë në pushtet.
“Ne besojmë se ndërhyrja e huaj do të çojë në pasoja edhe më të këqija, dhe se ndërhyrja e provokuar nga Izraeli në veçanti do të çojë në kriza edhe më të mëdha”, ka shtuar ai.
Kryeministri izraelit, Benjamin Netanyahu, ka thënë të shtunën se Izraeli po i monitoron nga afër protestat në Iran, duke shtuar se “Ne të gjithë shpresojmë që kombi persian së shpejti të çlirohet nga zgjedha e tiranisë”.
Trumpi dhe presidenti turk, Tayyip Erdogan, kanë lidhje të ngushta personale.
E grupi i të drejtave të njeriut me seli në SHBA, HRANA, ka thënë se kishte verifikuar vdekjen e 544 personave dhe arrestimet e 10,681 personave që nga fillimi i protestave më 28 dhjetor.
