Mijëra shqiptarë nga të gjitha trojet u mblodhën sot në sheshin “Skënderbeu” në Shkup, në një protestë paqësore kundër asaj që u cilësua si padrejtësi ndaj ish-krerëve të UÇK-së në proceset e Gjykatës Speciale. Tubimi, që zgjati rreth një orë, u shndërrua në një thirrje të bashkuar për “drejtësi dhe liri” për të akuzuarit, me kërkesa të drejtpërdrejta për Hashim Thaçin, Kadri Veselin, Rexhep Selimin dhe Jakup Krasniqin.
Ish-kreu i PDK-së, Memli Krasniqi, e përshkroi protestën si “gjithëkombëtare, të qetë, dinjitoze dhe të fuqishme”, duke theksuar se pjesëmarrja e gjerë ishte një dëshmi se “kjo kauzë është më e madhe se secili prej nesh”. Ai shtoi se mesazhi i sheshit ishte i qartë: mbrojtje e dinjitetit, e së vërtetës dhe e luftës së drejtë të UÇK-së.
