Lista e vendeve që tërhiqen nga Eurovision 2026 po zgjerohet.
Pas Spanjës, Irlandës dhe Holandës, edhe Sllovenia ka njoftuar se nuk do të marrë pjesë në edicionin e vitit të ardhshëm, pasi Izraeli u konfirmua si pjesëmarrës.
Vendimet erdhën pas mbledhjes së Bashkimit Evropian të Transmetuesve (EBU) në Gjenevë, ku u miratuan rregulla të reja për “forcimin e besimit dhe ruajtjen e neutralitetit” të garës.
Megjithëse disa vende kërkuan një votim të posaçëm mbi pjesëmarrjen e Izraelit, shumica e anëtarëve u shprehën të kënaqur me masat e reja, duke shmangur kështu votimin.
Transmetuesi holandez AVROTROS deklaroi se pjesëmarrja është “e papërputhshme me vlerat publike” në situatën aktuale.
Irlanda, Spanja dhe Sllovenia njoftuan tërheqjen me arsyetimin se vendimi për të lejuar Izraelin bie ndesh me qëndrimet e tyre.
Eurovision 2026 pritet të zhvillohet në Vjenë, por tashmë mes një bojkoti në rritje nga disa vende evropiane.
