Asociacioni i Gazetarëve të Kosovës e ka cilësuar si të papërgjegjshme dhe të rrezikshme gjuhën që anëtari i Lëvizjes Vetëvendosje në KQZ, Sami Kurteshi, ka përdorur kundër vetë AGK-së dhe disa mediave në Kosovë.
AGK cilëson se akuzat e Kurteshit e rrezikojnë gazetarët duke nxitur sulme të mundshme ndaj tyre.
Reagimi i plotë:
Deklaratat e Sami Kurteshit- të papërgjegjshme dhe të rrezikshme
Asociacioni i Gazetarëve të Kosovës (AGK) dënon fuqishëm gjuhën e papërgjegjshme, sulmuese dhe shumë të rrezikshme të anëtarit të KQZ-së, Sami Kurteshi, nga partia politike Vetëvendosje.
Kurteshi, në një reagim publik, e quajti AGK-në “Aleancë të Grupeve Kriminale” dhe listoi një sërë mediash, që sipas tij operojnë si “vrasës me pagesë”.
Këto akuza, përveç që janë të pabaza, paraqesin rrezik real për sulme të mundshme në të ardhmen ndaj gazetarëve dhe pjesëtarëve të mediave në punën e tyre profesionale në terren.
Deklaratat nxitëse të urrejtjes të z. Kurteshi janë vazhdimësi e një fushate linçuese ndaj gazetarëve, me qëllim frikësimin e tyre dhe minimin e lirisë së medias në vend.
AGK-ja e fton Vetëvendosjen, liderin e saj Albin Kurti dhe Presidenten e Republikës, Vjosa Osmani, që të konsiderojnë largimin e Kurteshit nga pozicioni i tij në Komisionin Qendror të Zgjedhjeve.
