Prej gati një muaji familjarët dhe avokatët nuk janë lejuar të vizitojnë ish-kryeministrin pakistanez.
Familja e ish-kryeministrit pakistanez Imran Khan ka bërë një apel publik drejtuar Mbretit Charles, duke kërkuar që ai të reagojë ndaj trajtimit “çnjerëzor” të liderit të opozitës, i cili mbahet në izolim të plotë në burgun Adiala në Rawalpindi.
Aleema Khanum, motra e tij, tha se prej gati një muaji familjarët dhe avokatët nuk janë lejuar të vizitojnë 73-vjeçarin, duke ngritur shqetësime serioze për shëndetin dhe sigurinë e tij.
“Si mundet një vend anëtar i Commonwealth të shkelë hapur parimet e demokracisë, shtetit të së drejtës dhe të drejtave të njeriut, ndërsa pjesa tjetër hesht?”, deklaroi ajo.
Khan po vuan një dënim 14-vjeçar për korrupsion, akuza që ai i quan të sajuara nga ushtria për ta larguar nga politika. Ushtria i ka mohuar akuzat.
Familja thotë se kushtet në burg përbëjnë trajtim torturues.
“Imran po mbahet 24 orë në një qeli 8 me 10, pa vizita, pa komunikim. Ne shqetësohemi për sigurinë e tij”, tha Khanum.
PTI, partia e tij, ka mbajtur protesta jashtë burgut, ndërsa hashtag-u #WhereIsImranKhan është bërë viral në rrjetet sociale.
Zëdhënësi i PTI-së, Sayed Zulfikar Bukhari, tha se qeveria po e izolon për të shmangur çdo deklaratë të tij për ndryshimet që ai i quan “antikushtetuese”.
“Është alarmante që vendet perëndimore, që mburren me demokraci, po heshtin përballë një regjimi të tillë”, theksoi ai.
Qeveria pakistaneze i ka quajtur akuzat “manovra politike”, duke këmbëngulur se Khan gëzon shëndet të mirë.
Ministri i Brendshëm Talal Chaudhry i quajti raportimet “thashetheme”, ndërsa u bëri thirrje mbështetësve të PTI të mos “përhapin panik”.
