Presidenti Volodymyr Zelensky ka thënë se prioritetet e Kievit në bisedimet e paqes për t’i dhënë fund luftës me Rusinë janë ruajtja e sovranitetit të Ukrainës dhe sigurimi i garancive të forta të sigurisë.
Zelensky tha se “çështja territoriale është më e vështira”, pasi Rusia vazhdon të kërkojë që Ukraina të heqë dorë nga zonat e rajonit lindor të Donbasit që ende i mban – gjë që Kievi pohon se nuk do ta bëjë kurrë, shkruajnë mediat e huaja, përcjell Telegrafi.
Ai foli pas takimit me presidentin francez Emmanuel Macron në Paris, ku iu bashkua një thirrjeje me udhëheqësit evropianë, përfshirë ata të Mbretërisë së Bashkuar, Gjermanisë, Polonisë dhe Italisë.
Ndërkohë, negociatorët ukrainas dhe amerikanë përfunduan dy ditë takimesh në Florida, ndërsa punonin për të rishikuar një plan paqeje të parë si favorizues të Rusisë.
Shtëpia e Bardhë dha një ton pozitiv për bisedimet të hënën, me Sekretaren e Shtypit Karoline Leavitt që tha se administrata “ndihet shumë optimiste” për një marrëveshje që po arrihet për t’i dhënë fund luftës.
Në anën tjetër, Zelensky ishte më i kujdesshëm, duke postuar në X se bisedimet ishin “shumë konstruktive”, por ka “disa çështje të vështira që ende duhet të trajtohen”.
Ndërkohë, i dërguari special i SHBA-së, Steve Witkoff, i cili mori pjesë në bisedime me delegacionin ukrainas, tani është nisur për në Rusi, ku do të takohet me presidentin rus Vladimir Putin të martën.
Ata do të shoqërohen nga dhëndri dhe këshilltari i presidentit Trump, Jared Kushner.
Witkoff ka folur me Zelensky-n, Macron-in, kryenegociatorin ukrainas Rustem Umerov dhe kryeministrin e Mbretërisë së Bashkuar Keir Starmer, dhe pritet t’ia përcjellë rezultatin e diskutimeve Putinit.
