Real Madrid ka marrë barazimin e tretë rresht në La Liga, pasi sot nuk shkoi më shumë se shifrat 1-1 në transfertën ndaj Girona. Minutat e para ishin disi të mërzitshme, me një lojë të vakët dhe me pak raste nga të dy ekipet, por minutat e fundit të pjesës së parë ishin vërtet të bukura.
Në minutën e 40-të, Real Madrid gjen golin me të zakonshmin Kylian Mbappe, i cili shënon pas një rrëmuje në zonë. Festa e madrilenëve shkon kot, pasi ndërhyn VAR dhe goli anullohet për prekje të topit me dorë nga Mbappe, para se ta dërgonte atë në rrjetë.
Vetëm pak minuta më pas, Girona gjen avantazhin me golin e bukur të Azzedine Ounahi, pas asistit fantastik nga Tsygankov. Pjesa e parë mbyllet me shifrat 1-0.
Vendasit e nisin më mirë pjesën e dytë, ku Vladyslav Vanat kishte shansin e artë për të dyfishuar shifrat në minutën e 56-të, por Thibaut Courtois tregohet i jashtëzakonshëm me pritjen e tij dhe shpëton madrilenët nga goli i dytë.
Barazimi i madrilenëve do të vinte në minuten e 66-të nga Kylian Mbappe. Francezi shënoi nga pika e bardhë e penalltisë, e fituar nga Vinicius Junior, pas një faulli ndaj tij brenda në zonë.
Në minutën e 80-të, Real Madrid pretendon për një tjetër penallti, këtë herë për faull ndaj Rodrygo-s, por arbitri vazhdon lojën normalisht. Rezultati mbeti i pandryshuar deri në fund, sfida mbyllet 1-1.
Pas këtij barazimi, Real Madrid humb vendin e parë dhe tani gjendet në vendin e dytë me 33 pikë, me një pikë më pak se Barcelona. Villarreal renditet i treti me 32 pikë, Atletico Madrid mbyll katërshen e parë me 31 pikë. Ndërkohë që Girona renditet në vendin e 18-të me 12 pikë.
The post Real Madrid shpëton nga disfata falë një penalltie dhe humb vendin e parë (video) appeared first on Telesport.
