Zyrtari i AAK-së, Pal Lekaj, ka reaguar pasi Partia Shqiptare Demokristiane e Kosovës (PSHDK), ka lidhur koalicion parazgjedhor me Lëvizjen Vetëvendosje, shkruan Reporteri.net.
Lekaj thotë se “Partia Demokristiane”, e trashëguar nga i ndjeri Mark Krasniqi, nga një parti me vlera të mirëfillta të djathta është kthyer në një “degë të majtë”.
“Kapitullimi i tyre është sot dhe kjo do të vërtetohet më 28 dhjetor.”, ka shkruar Lekaj.
Postimi i plotë nga Lekaj:
“Partia Demokristiane”, e trashëguar nga i ndjeri Mark Krasniqi, nga një parti me vlera të mirëfillta të djathta është kthyer në një “degë të majtë”.
Jam më se i bindur se udhëheqja e kësaj dege lokale as nuk i di e as nuk i kupton konceptet e drejtimeve politike, sepse pikërisht kjo udhëheqje e ka shkatërruar një parti që ishte simbol i vendit në shumë procese të rëndësishme.
Në krye të saj erdhën njerëz që nuk ishin pjesë e asnjë procesi të mirë për vendin, dhe këtë e dëshmuan edhe me koalicionin me të majtën ekstreme në Kosovë, duke treguar se për ta kanë rëndësi vetëm interesat e një grupi klanor, që po e çon një nga partitë e para shqiptare në Kosovë drejt fundosjes.
I ftoj të gjitha strukturat dhe mbështetësit e vlerave të djathta që t’u bashkohen këtyre vlerave kombëtare për të mirën e vendit, sepse të gjithë e dimë se ku janë ato vlera kombëtare.
Kapitullimi i tyre është sot dhe kjo do të vërtetohet më 28 dhjetor.
