Mimoza Kusari-Lila e “Alternativës” para dy muaje shqiptoi publikisht një kusht ndaj Vetëvendosjes së Albin Kurtit, shefe e Grupit Parlamentar të të cilëve kishte qenë për plot një mandat legjislativ katërvjeçar.
Kusari-Lila në “Rubikon” te Adriatik Kelmendi, tha se e ka dëmtuar partinë e saj duke u homogjenizuar dhe shkrirë në VV, ç’gjë, sipas saj, nuk do të jetë më rasti.
Tha se do të kërkojë “koalicion formal”, me emër dhe llogo të partisë së vet në fletvotim.
Preferenca e parë, tha ajo me patjetër, është Vetëvendosja; dhe, nëse kushti i saj s’përmbushet, nuk përjashtoi se do të synojë koalicion me parti tjera.
Dy muaj më vonë, kjo gjë duket të ketë qenë e parealizueshme.
Në ora 23:59 Komisioni Qendror Zgjedhor i pret afatin e fundit të deklarimit të koalicioneve zgjedhore, ndërsa Vetëvendosja s’ka dhënë asnjë shenjë se do të pranojë “emrat” e Alterantivës, dhe, as të Guxo-s, në fletvotime: por se, me ç’duket, do të jetë lista e Vetëvendosjes me koalicion të brendashkrirë.
“Si kusht publik, e kam vendosur që me këdo që bisedoj…më së pari me Vetëvendosjen, kërkoj koalicion formal; vetëm përfshirja në listë, me koalicion formal”, tha ajo.
As Guxo e Faton Pecit nuk ka dhënë shenja se do të kërkojë të ketë emrin e saj të spikatur me koalicion formal; ç’gjë, zgjedhjet e kaluara, kishte shkaktuar indinjatë në Guxo, ku degë të kësaj partie kishin mbyllur aktivetet zgjedhore në degët e Ferizajt dhe Pejës.
Guxo-ja, si arsyetim, e kishte dhënë si “vonesë procedurale” dhe s’kishin mbërrirë në kohë.
Kjo ishte lexuar me dyshim të madh.
LDK dhe Nisma
Nacionale ditë më parë raportoi me burime të mirëinformuara se ka pasur rezistencë të mëdha brenda degëve, strukturave dhe elektorait të Lidhjes Demokratike të Kosovës për të marrë Nismën Socialdemokrate për të garuar në një listë.
Nga LDK nuk ka pasur as pohim e as mohim zyrtarë për raportimet, ndërsa për këtë gjë nuk janë deklaruar as nga Nisma Socialdemokrate e Fatmir Limajt. Kryetari i kësaj partie, Lumir Abdixhiku, ditë më parë, tha se “janë dyert e hapura” edhe për Nismën Socialdemokrate të Limajt, Partinë e Drejtësisë, Demokristianët dhe AKR-në.
“LDK do të kujdeset që një pjesë të listës së vet ta hap edhe për partitë e tjera, përfshirë edhe zotin Limaj, me deputetët e vet”, pati thënë Abdixhiku. “Kemi gatishmëri. Siç kemi edhe për parti si Demokristianët, Partinë për Drejtësi, Aleancën e zotit Pacolli, jemi të hapur për parti dhe individ”.
Sot është dita e fundit të afatit ligjor që u lejon partive politike të deklarojnë nëse synojnë të garojnë në zgjedhjet e 28 dhjetorit përmes koalicioneve parazgjedhore.
Sipas të dhënave zyrtare, deri të shtunën në orën 13:00 pranë Zyrës për Regjistrim, Certifikim dhe Kontroll Financiar të Subjekteve Politike janë dorëzuar dy njoftime për formim koalicionesh: njëri që bashkon PAI-n, PDAK-un dhe Lëvizjen për Bashkëveprim; tjetri që sjell së bashku tri parti boshnjake nën ombrellën e koalicionit VAKAT.
“Deri dje në ora 13:00 KQZ, respektivisht Zyra për Regjistrim, Certifikim dhe Kontrollin Financiar të Subjekteve Politike është njoftuar për formimin e dy koalicioneve për pjesëmarrje në zgjedhje, si në vijim:
– “PAI – PDAK – LPB”, i përbërë nga 3 parti politike: Partia e Ashkalinjëve për Integrim (PAI), Partia Demokratike e Ashkanlive të Kosovës (PDAK) dhe Lëvizja për Bashkëveprim (LPB)”; dhe
– Koalicioni VAKAT, i përbërë nga 3 parti politike: Demokratska Stranka Bošnjaka (DSB), Bošnjačka Stranka Kosova (BSK) dhe Demokratska Stranka Vatan (DSV)” – ka njoftuar KQZ.
Ndërkohë, subjektet e mëdha kanë njoftuar marrëveshje me parti më të vogla që zgjedhin të garojnë brenda listave të tyre. Partia e Drejtësisë ka konfirmuar se kandidatët e saj do të jenë pjesë e listës së LDK-së.
Ndërsa, Partia Demokratike e Kosovës njoftoi marrëveshjen me deputetët e Nismës për Familjen, të cilët do t’i bashkohen listës zgjedhore të PDK-së.
“Respekti, mirëbesimi dhe përgjegjësia për Kosovën na kanë bashkuar gjithmonë. Duke u bazuar në këto vlera, sot kemi arritur një marrëveshje me Grupin e Deputetëve të Familjes, të cilët do të jenë pjesë e listës sonë zgjedhore.
Kosova është përgjegjësi e të gjithëve dhe secili prej nesh ka rol në ndërtimin e një të ardhmeje më të sigurt, më dinjitoze dhe më pranë qytetarëve. Kosova na bashkon.” – ka shkruar Hamza.
Rregullat parashohin që një koalicion të përbëhet nga të paktën dy parti dhe se pas certifikimit asnjëra palë nuk ka të drejtë të tërhiqet deri në verifikimin përfundimtar të rezultatit zgjedhor. Po ashtu, një parti që bëhet pjesë e një koalicioni nuk mund të paraqitet paralelisht në një aleancë tjetër apo me listë të vetën në të njëjtën palë zgjedhjesh.
Kosova do të shkojë sërish në zgjedhje më 28 dhjetor, pasi procesi i dalë nga zgjedhjet e 9 shkurtit dështoi të prodhonte një ekzekutiv. Institucionet mbeten të bllokuara për muaj të tërë, me koalicionin fitues VV-Guxo-Alternativa që në fund dështuan të siguronin votat e nevojshme për ta zgjedhur qeverinë në dy raste.
