Përshkallëzohen debatet mbi drejtësinë dhe unitetin kombëtar në Izrael.
Kryeministri izraelit, Benjamin Netanyahu, ka dorëzuar zyrtarisht një kërkesë për falje pranë Presidentit Isaac Herzog, një hap që mund të ndikojë thellë në sistemin juridik dhe politikën izraelite.
Presidenca konfirmoi se para çdo vendimi, do të kërkohen opinionet e autoriteteve të drejtësisë, duke e cilësuar kërkesën si “të jashtëzakonshme dhe me pasoja të rëndësishme”.
Netanyahu, i cili prej pesë vitesh po gjykohet për korrupsion në tre çështje të ndara – ryshfet, mashtrim dhe shkelje besimi – i ka hedhur poshtë të gjitha akuzat, duke i quajtur ato një “gjueti shtrigash”.
Në një mesazh video, ai tha se do të kishte preferuar ta çonte procesin deri në fund, por se “interesi kombëtar kërkonte ndryshe”, duke argumentuar se një falje do të ulte tensionet dhe do të ndihmonte “pajtimin kombëtar”.
Kërkesa vjen pak javë pasi presidenti amerikan Donald Trump i bëri thirrje publikisht presidentit Herzog që të falë plotësisht Netanyahu-n, ndërsa vetë Herzog kishte theksuar se falja mund të kërkohej vetëm përmes një kërkese zyrtare.
Tre çështjet e korrupsionit
Kryeministri akuzohet se:
- ka marrë dhurata luksoze nga biznesmenë të fuqishëm në këmbim të favoreve;
- ka ofruar mbështetje për rritjen e tirazhit të një gazete izraelite në këmbim të raportimit pozitiv;
- ka ndërhyrë në vendimmarrje rregullatore në favor të aksionarit kryesor të një kompanie telekomunikacioni, gjithashtu në këmbim të trajtimit pozitiv në media.
Netanyahu është kryeministri i parë në detyrë që del para gjykatës, dhe një falje e mundshme do të zhbënte procesin para përfundimit.
Sipas ligjit izraelit, presidenti ka kompetencë të falë ose të ndryshojë dënimet, madje edhe para shpalljes së fajësisë, nëse vlerësohet se është në interes publik.
Një provë për demokracinë izraelite
Mbështetësit e Netanyahu-t e konsiderojnë faljen të domosdoshme për stabilitetin e vendit. Por kritikat janë të ashpra, sidomos nga e majta, ku ky hap shihet si një tjetër goditje ndaj shtetit ligjor.
Muajt e gjatë të protestave masive kundër reformave gjyqësore të Qeverisë së tij mbeten ende të freskëta në kujtesën e publikut dhe debati mbi balancën mes drejtësisë dhe politikës është rikthyer fuqishëm.
Presidenti Herzog nuk ka dhënë një afat për vendimin. Megjithatë, çështja pritet të ndezë edhe më tej diskutimet mbi drejtimin e vendit në një moment që Izraeli përballet njëkohësisht me kriza të mëdha të sigurisë dhe polarizim të brendshëm.
