Kryetari i Nismës Socialdemokrate, Fatmir Limaj, ka kujtuar sot 20-vjetorin e aktgjykimit që e shpalli të pafajshëm në Hagë, duke e lidhur këtë datë me vlerësimin e drejtësisë ndërkombëtare për luftën e Ushtrisë Çlirimtare të Kosovës. Ai theksoi se vendimi i atëhershëm konfirmoi karakterin çlirimtar të luftës dhe sakrificën e një populli që u përpoq të jetonte i lirë.
Në reagimin e tij, Limaj rikujtoi sfidat e mëdha të procesit gjyqësor, kur Kosova ende nuk kishte shtetësi dhe të akuzuarit përballeshin pa mbështetjen institucionale që kërkohej në një proces të tillë. Ai tha se UÇK-ja dhe vetë e vërteta e luftës u testuan për herë të parë para instancave ndërkombëtare, por se mbështetja e qytetarëve dhe bindja në drejtësinë e kauzës i mbajtën të fortë.
“Ballafaqimi ynë gjyqësor në Hagë ishte i gjatë dhe sfidues. Në atë kohë Kosova nuk ishte shtet dhe ne ishim pa asnjë përkujdesje institucionale, pa mbrojtje të organizuar, ashtu siç do të duhej ta kishim në një proces të tillë gjyqësor. Edhe ne si individë, edhe e vërteta e luftës sonë çlirimtare, për herë të parë po sfidoheshin në nivelet e drejtësisë ndërkombëtare në Hagë. Në gjithë këtë proces e kishim të vërtetën e UÇK-së dhe mbështetjen e popullit.”
