Spitali i Gjakovës ka reaguar ndaj pretendimeve të një burri, se gruaja që bashkëjetonte me të ka vdekur si pasojë e mos kujdesit nga mjekët, ku spitali mohoi këto pretendime.
“Pacientja M.R. ka qenë në gjendje komatoze (pa vetëdije) për më shumë se tre vite dhe gjatë gjithë kësaj periudhe ka qenë e shtrirë në Kujdes Intensiv Qendror.
Për tri vite me radhë, pacientja është trajtuar nga mjekët dhe infermierët e kujdesit intensiv, në përputhje të plotë me protokollet mjekësore të aplikueshme për raste të tilla. Denoncuesi nuk është pjesë e familjes së pacientes. Deklaratat e tij nuk përputhen me faktet dhe paraqesin tentativë të qëllimshme për të njollosur punën e stafit mjekësor, i cili për tri vite ka ofruar kujdes të pandërprerë, profesional dhe të përgjegjshëm”, thuhet në reagimin e spitalit.
Tutje sipas spitalit edhe pse vizitat në Kujdesin Intensiv operohen me rregulla strikte, familjarët e pacientes kanë qenë të pranishëm gjatë gjithë kohës që ajo ka qëndruar në spital.
“Nuk është detyrë e jona të hyjmë në çështje të brendshme familjare dhe askush nuk mund të përfitojë duke shpifur apo duke manipuluar opinionin me deklarata të pavërteta. Kërkojmë që organet kompetente — Inspektorati Shëndetësor, Policia dhe Prokuroria — ta trajtojnë rastin me seriozitet dhe të mos lejojnë baltosjen e punës së punëtorëve shëndetësorë për interesa personale të askujt”, thuhet ndër të tjera në njoftim. /gazetametro.net
