I intervistuar nga “Cronache di Spogliatoio”, Thomas Strakosha, ish-portieri i Lazios dhe aktualisht tek AEK Athinë, ka rrëfyer emocionet, kujtimet dhe reflektimet mbi karrierën e tij, nga vitet në Serie A deri te rilindja në futbollin grek. Ai foli për periudhën te Lazio, për marrëdhënien me Simone Inzaghin dhe rikthimin në formë në kampionatin ku luan sot.
VITET TE LAZIO – “Lazio e Immobile, Luis Alberto dhe Milinkovic-Savic? Jam kënaqur jashtë mase duke luajtur me ta. Ndoshta kanë qenë vitet më të bukura të karrierës sime. Më i forti teknikisht, për mua, ka qenë Pedro. Impresionues”.
INZAGHI DHE DEBUTIMI – “Ai më bëri të debutoja në Serie A. Është njeri që bën shumë shaka, ta heq presionin nga shpatullat. Do ta falënderoj gjithmonë. Po bën shumë mirë edhe në Arabi, e meriton karrierën që ka tashmë. Uroj ta kem ndihmuar qoftë edhe pak”.
PENGU DHE LARGIMI NGA LAZIO – “Kanë qenë 10 vite fantastike te Lazio. Peng, mosqëndrimi gjithë jetën te Lazio? Jo, e dija që një ditë do të kthehesha në shtëpi. Të largohesha nga shtëpia në moshën 16-vjeçare nuk ishte e lehtë, por më ndihmoi të rritesha si burrë. Ende flasim të gjithë me njëri-tjetrin, edhe pse nga Lazio ime e dikurshme pothuajse nuk ka mbetur askush”.
RILINDJA NË GREQI – “Pas dëmtimit në Premier League, humba gati një vit karrierë. Aty më kapën dyshimet: ‘A do të kthehem ndonjëherë si më parë?’. Tek AEK jam rikthyer për të qenë i lumtur dhe kjo shihet në fushë. Këtu ka plot ish-lojtarë të Serie A: Joao Mario, Jovic, Brignoli, Pereyra dhe Marin, bëjmë gjithmonë shaka. Zgjodha Shqipërinë për familjen time, por kam lindur në Athinë, kjo është shtëpia ime. Më ka habitur niveli i kampionatit grek, nuk e prisja të ishte rritur kaq shumë. Ju siguroj, skuadrat e mëdha greke nuk kanë asgjë për t’u pasur zili klubeve të Spanjës, Italisë apo Anglisë”.
The post Strakosha: E zgjodha Shqipërinë prej familjes, por kam lindur në Athinë. Kjo është shtëpia ime appeared first on Telesport.
