Tash e dy vite, Këshilli Prokurorial është në pritje të një vendimi nga ana e presidencës në lidhje me dekretimin e Blerim Isufaj si kryeprokuror të shtetit. Deri në marrjen e një përgjigje nga presidenca, KPK thotë se nuk parashohin të ndërmarrin ndonjë veprim tjetër. Në ndërkohë, posti i kryeprokurorit ka katër vite që funksionon me ushtrues detyre.
Që nga 1 tetori i vitit 2023, emri i Blerim Isufaj qëndron në sirtarët e presidencës.
Këshilli Prokurorial dy vite më parë, dërgoi për herë të dytë emrin e Isufaj për t’u dekretuar si kryeprokuror.
Sot e kësaj dite, KPK është ende në pritje të vendimin nga ana e presidencës.
“Sa i përket postit të Kryeprokurorit të Shtetit, ju njoftojmë se Këshilli Prokurorial i Kosovës është ende në pritje të dekretimit të Kryeprokurorit të Shtetit, z. Blerim Isufaj. Deri më tani, KPK-ja nuk ka paraparë ndërmarrjen e ndonjë vendimi tjetër për këtë proces. Siç kemi njoftuar opinionin publik edhe më herët, në këtë aspekt, një nga pengesat kryesore ka qenë mungesa e veprimit nga ana e presidentes së vendit, znj. Vjosa Osmani, pavarësisht se KPK-ja ka përmbushur të gjitha obligimet ligjore dhe me kohë ka dërguar për dekretim emrin e kandidatit të përzgjedhur për Kryeprokuror të Shtetit, por nuk ka marrë përgjigje të qëndrueshme mbi këtë çështje”, thuhet nga Këshilli Prokurorial.
Nga presidenca nuk kanë dhënë përgjigje lidhur me këtë çështje.
E pikërisht nga ky institucion, vlerësohet se mund të zhbllokohet posti i kryeprokurorit të shtetit.
“KPK-ja e ka përfunduar pjesën e vet, është çështje tjetër se sa jemi të kënaqur me atë proces. Mirëpo, në situatën tani ku jemi natyrisht që emri i dekretimit të kryeprokurorit të shtetit ka ngelur në sirtarët e presidentes, sepse presidenca është ai organi që më në fund e dekreton ose e kthen gjithë procesin në pikën zero”, deklaroi Anton Nrecaj nga Instituti Clard.
Nga shoqëria civile e nga përfaqësuesit ndërkombëtarë në vend, në vazhdimësi kanë kërkuar konkurs të ri për kryeprokuror, por që një gjë e tillë nuk është inicuar ende nga KPK-ja.
