Përfaqësuesi i Vetëvendosjes në Komisionin Qendror të Zgjedhjeve (KQZ), Sami Kurteshi, ka folur pa karar derisa shprehu shqetësimin e tij për votat me asistencë në Han të Elezit.
Sipas tij, nga mbi 5 mijë votues, 527 janë me asistencë.
Teksa ka përmendur rastet e evidentuara, ku 243 janë identifikuar si të verbër, ai eskaloi me gjuhë duke thënë se “nuk mundet njerëzit atje me qenë ma qorra se në Gjilan e Deçan”.
Sipas tij, bazuar në të dhënat zyrtare, atje veç një person është i regjistruar si i verbër, i cili, siç thotë Kurteshi, merr pension të mirë, prej 300 eurosh.
“Numri i madh të votave me asistencë në Han të Elezit. Pjesëmarrja është 5 mijë e 15 votues, nga 8 mijë e diçka. Prej tyre, 527 janë me asistencë ose 10,51%. Nga ta, të verbër janë 243, kurse analfabetë 244.
Sipas të dhënave nga departamenti i pensioneve, kam komuniku dhe po komunikoj me ta, në Komunën e Hanit të Elezit, është veç një person i verbër, që merr pension, që është relativisht i mirë, 300 euro.
Nuk mundet Hani i Elezit, njerëzit atje me qenë ma qorra se Gjilani bre, ose Deçani. Edhe na jemi goxha, po bash qikaq jo.”
Ai përmendi edhe rastet e tjera të regjistruara me asistencë, një me sëmundjen e Parkinsonit, dy për arsye të gjendjes shëndetësore dhe gjashtë që s’kanë pasur mundësi të votojnë të vetëm.
Kurteshi tha vota me asistencë është ose “votë e shitur, pra e korruptuar, ose e shantazhuar, e kërcënuar”, transmeton Klankosova.tv
Këtu, ai e përmendi edhe diasporë, që tha se kanë mundësi materiale ta blejnë votën.
“Diaspora nuk e shet votën, por i ka ble këta këtu edhe i orienton. Diaspora e blen votën se ata i kanë mundësitë materiale, e blen votën brenda.”
