“Armiku” Figo i imponohet Barçës nga UEFA: “Është një poshtërim, deklaratat e tij janë të pahijshme”

Luis Figo do të rikthehet në “Estadi Olímpic Lluís Companys” si ambasador i UEFA-s për ndeshjen e Champions-it mes Barcelonës dhe PSG-së. Herën e fundit që ai shkelte fushën e Barçës, atëherë në “Camp Nou”, ishte viti 2009, si lojtar i Interit.

Historia e tij me katalanasit mbetet e tensionuar. Nga hero i Barcelonës, ai u kthye në “armikun e madh”, pas transferimit te Real Madridi në vitin 2000. Në rikthimin e parë me fanellën e bardhë, ai u përball me një atmosferë armiqësore: fishkëllima, pankarta, kartëmonedha me fytyrën e tij…, madje edhe një kokë derri e hedhur në fushë.

Edhe pas 25 vitesh, inati i tifozëve blaugrana nuk është fashitur. Shembull i kësaj ishte incidenti gjatë finales së Champions League për femra në Lisbonë, ndërsa ish-presidenti Joan Gaspart e përkufizoi hapur: “Figo është i vetmi armik që ka Barcelona”.

Në programin “Tu Diràs” të RAC1, drejtuesit e debatit e cilësuan rikthimin e tij në fushën e Barcelonës si “një poshtërim që protokolli duhej ta kishte shmangur”, duke shtuar se deklaratat e fundit të Figos për Barçën kanë qenë “krejtësisht të pahijshme”.

The post “Armiku” Figo i imponohet Barçës nga UEFA: “Është një poshtërim, deklaratat e tij janë të pahijshme” appeared first on Telesport.