Ushtria amerikane ka lëshuar raketa parandaluese të nivelit të lartë me vlerë 500 milionë dollarë për të mbrojtur Izraelin nga sulmet e Iranit dhe armiqve të tjerë rajonalë, sipas dokumenteve të reja të Pentagonit.
Dokumentet e publikuara rishtazi mbi buxhetin japin një pasqyrë të re mbi përmasat e mbrojtjes që ushtria amerikane ka ofruar për Izraelin, si dhe armët që forcat amerikane kanë përdorur gjatë bombardimeve të mëdha të objekteve bërthamore iraniane në qershor.
Në një nga dokumentet kërkohen 498.265 milionë dollarë financim për të zëvendësuar raketat parandaluese të sistemit të mbrojtjes në lartësi të mëdha (THAAD), të cilat janë “shpenzuar në mbështetje të Izraelit”.
“Kjo është një çështje me interes të veçantë për Kongresin. Ky është një kërkesë urgjente për buxhet”, thuhet në dokument.
Ligjvënësit amerikanë duhet të miratojnë çdo ndryshim në financim, shkruan businessinsider.
THAAD është një sistem mbrojtjeje ajrore i prodhuar nga kompania amerikane e mbrojtjes “Lockheed Martin” dhe është projektuar për të ndjekur raketat balistike me rreze të shkurtër dhe të mesme gjatë fazës përfundimtare të fluturimit. THAAD është një nga sistemet tokësore më të avancuara të mbrojtjes ajrore në përdorim nga forcat amerikane. Ka rreze të gjatë veprimi dhe është në gjendje të godasë objektiva në një distancë nga 93 deri në 124 milje, si brenda ashtu edhe jashtë atmosferës. Armët e këtij sistemi shkatërrojnë raketat armike përmes një goditjeje direkte, dhe jo me shpërthim afër objektivit.
Ushtria amerikane nisi zhvillimin e sistemit THAAD në fillim të viteve 1990. Ai hyri në përdorim në vitin 2008 dhe për herë të parë u përdor në betejë nga trupat e Emirateve të Bashkuara Arabe në vitin 2022 kundër një rakete balistike të lëshuar nga Houthit.
Një bateri standarde THAAD përfshin rreth 100 ushtarë, një njësi për drejtimin e zjarrit dhe komunikimit, gjashtë lëshues të montuar në kamionë, si dhe një radar të avancuar. Ushtria amerikane zotëron shtatë bateri THAAD – disa prej tyre të vendosura jashtë vendit – dhe ka përdorur dy prej tyre për të mbrojtur Izraelin nga sulmet e Iranit dhe Houthi-ve.
– YouTube www.youtube.com
THAAD kaloi nëpër stërvitjen më intensive gjatë një periudhe 12-ditore në fillim të qershorit, gjatë së cilës Irani lëshoi qindra raketa balistike drejt Izraelit. SHBA-të raportohen se kanë shpenzuar mes 100 dhe 150 raketa gjurmuese THAAD për të mbrojtur Izraelin nga sulmet iraniane. Çdo raketë THAAD kushton rreth 12.7 milionë dollarë, sipas dokumenteve të Agjencisë Amerikane për Mbrojtje nga Raketat.
Sasia e madhe e raketave të përdorura gjatë luftës së qershorit, dhe në përgjithësi në mbrojtjen e Izraelit, ka ngjallur shqetësime për mungesën e mundshme të rezervave amerikane.
Izraeli ka një sistem të vetin ekuivalent me THAAD, të quajtur Arrow 3. Ky sistem, së bashku me mjetet e tjera mbrojtëse ajrore amerikane dhe izraelite, ka operuar me intensitet të lartë gjatë përplasjes së shkurtër – por vdekjeprurëse – në qershor.
Dokumentet e fundit buxhetore të Pentagonit, për të cilat raportoi fillimisht The War Zone, zbulojnë gjithashtu detaje të reja për armët e përdorura nga ushtria amerikane gjatë sulmeve në qershor ndaj objekteve bërthamore iraniane, të njohura si Operacioni Midnight Hammer.
Zyrtarët amerikanë kanë bërë me dije më herët se bombarduesit B-2 Spirit, të cilët janë “të padukshëm”, hodhën 14 bomba GBU-57 për shkatërrimin e bunkerëve në objektet bërthamore iraniane. Ata gjithashtu konfirmuan se një nëndetëse e Marinës Amerikane ka lëshuar mbi 20 raketa lundrimi Tomahawk.
Zyrtarët shtuan se avionët luftarakë të gjeneratës së katërt dhe të pestë kanë marrë pjesë në operacion, edhe pse nuk dihej saktësisht se çfarë armësh përdorën gjatë misionit.
Një nga dokumentet e reja kërkon 2.3 milionë dollarë për të zëvendësuar bombat e vogla të llojit GBU-39, një bombë precize fluturuese prej 112 kg e prodhuar nga kompania amerikane Boeing, e cila mund të jetë përdorur kundër objektivave iraniane të raketave tokë-ajër.
Dokumenti kërkon gjithashtu 3.3 milionë dollarë për të zëvendësuar raketat e drejtuara me lazer AGR-20 FALCO Advanced Precision Kill Weapon System (APKWS), të prodhuara nga kompania britanike BAE Systems.
