Kryeparlamentari Dimal Basha është pyetur sot se si do të veprohet pas 30 shtatorit, kur përfundon masa e përkohshme e vendosur nga Gjykata Kushtetuese, pas kërkesës së Listës Serbe për zgjedhjen e nënkryetarëve të Kuvendit.
Basha vetëm ka thënë se Kuvendi është konstituuar, pa u deklaruar për hapat e mëtejshëm.
“Mendoj që e keni pa atë shpalljen…është konstituuar Kuvendi”, ka thënë shkurt Basha.
Vendimi i Kushtetueses, i publikuar me 5 shtator, ua ndalon deputetëve të zgjedhur të Kuvendit të Kosovës deri më 30 shtator çdo veprim dhe vendim si dhe ndalon procedurat për formimin e Qeverisë.
“… Gjykata konsideron se pa u vlerësuar pretendimet e lartcekura të parashtruesve të kërkesës në rastin para saj, është e domosdoshme që të ndalohen të gjitha veprimet e mëtejme drejt zgjedhjes së Qeverisë dhe vazhdimit të punës së Kuvendit, në mënyrë që të mos cenohet rendi juridik dhe demokratik në Republikën e Kosovës”, thuhet në vendim.
Sipas Gjykatës, masa e përkohshme mund “të evitojë rreziqe apo dëme të pariparueshme” që ndërlidhen me themelimin e institucioneve shtetërore dhe nxjerrjen e vendimeve në kundërshtim me Kushtetutën.
Gjykata ka kosndideruar se pa u vlerësuar pretendimet e Listës Serbe, është e domosdoshme që të ndalohen të gjitha veprimet e mëtejme drejt zgjedhjes së Qeverisë dhe vazhdimit të punës së Kuvendit, në mënyrë që të mos cenohet rendi juridik dhe demokratik në Republikën e Kosovës.
Basha e ka përmbyllur seancën konstituive, pa u zgjedhur nënkryetari serb, duke e konsideruar Kuvendin si të konstituuar.
