Sondazhi i Institutit Ndërkombëtar Sociologjik të Kievit tregoi se 75 për qind e ukrainasve e konsiderojnë tërësisht të papranueshëm planin e paqes të propozuar nga Rusia për përfundimin e luftës, ndërsa 74 për qind do të mbështesnin planin evropian të paqes.
Sipas rezultateve të sondazhit, të zhvilluar nga 2 deri më 14 shtator, vetëm 17 për qind e ukrainasve mund ta pranojnë versionin rus të paqes.
Sociologët paraqitën pikat kryesore të “planit të paqes” të propozuar nga Rusia – SHBA-ja dhe Evropa të heqin të gjitha sanksionet kundër Rusisë, gjuha ruse të marrë status zyrtar, Ukraina të zvogëlojë ndjeshëm forcat e saj të armatosura dhe armatimin, Ukraina të heqë përgjithmonë dorë nga anëtarësimi në NATO, dhe Perëndimi të mos ketë më të drejtë të furnizojë Ukrainën me armë.
Më tej thuhet se, sipas këtij plani, Rusia ka të drejtë të përcaktojë garancitë e sigurisë për Ukrainën dhe të jetë një nga garantuesit e sigurisë së saj. Gjithashtu, Ukraina duhet të tërheqë trupat nga pjesët e rajonit të Donetskut që aktualisht kontrollon.
Ndërkohë, 74 për qind e ukrainasve janë të gatshëm të mbështesin planin evropian dhe atë ukrainas. Vetëm 15 për qind e hedhin poshtë kategorikisht.
Nëse plani rus “i paqes” do të bëhej realitet, 65 për qind e ukrainasve do ta konsideronin si një dështim për Ukrainën.
Në rastin e planit evropian dhe atij ukrainas, 30 për qind do ta konsideronin si një sukses të pjesshëm ose të plotë, dhe 44 për qind të tjerë do ta shihnin si një sukses 50/50 për Ukrainën. Vetëm 18 për qind do ta konsideronin si një dështim për vendin.
