Ministri i Mbrojtjes u përgjigj në Parlament nëse vendi është i përgatitur në rast se dronët rusë hyjnë në hapësirën ajrore gjermane.
Ministri gjerman i Mbrojtjes, Boris Pistorius, deklaroi të mërkurën në Bundestag se forcat e armatosura të vendit janë plotësisht të gatshme për të reaguar në rast të një shkeljeje të hapësirës ajrore gjermane nga dronët rusë.
“Forcat tona të armatosura, aviacioni, mbrojtja ajrore, njësitë dhe ushtarët tanë e dinë saktësisht çfarë duhet të bëjnë në një situatë të tillë”, theksoi Pistorius, duke dhënë një mesazh të qartë mbi gatishmërinë operacionale të Bundeswehr-it.
NATO aktivizoi më parë Nenin 4 të Traktatit të Atlantikut të Veriut, me kërkesë të Polonisë, pas shkeljes së hapësirës ajrore të saj nga disa dhjetëra dronë sulmues rusë gjatë natës së kaluar.
Ky nen parashikon që Këshilli i Atlantikut të Veriut të nisë menjëherë konsultime të mbrojtjes dhe të sigurisë në raste emergjente ose situata urgjente, kur “integriteti territorial, pavarësia politike apo siguria e ndonjë prej palëve është e kërcënuar”.
Aktivizimi i Nenit 4 është një prej masave më të forta politike që një shtet anëtar i NATO-s mund të ndërmarrë dhe zakonisht paraprin diskutime mbi opsione të rritjes së pranisë ushtarake, mbrojtjes ajrore apo masa të tjera të përbashkëta të sigurisë.
Polonia është më afër konfliktit të hapur që nga Lufta e Dytë Botërore, tha kryeministri Donald Tusk të mërkurën pasi shteti anëtar i NATO-s rrëzoi dronë rusë mbi territorin e saj.
Ai tha se Polonia i kishte kërkuar NATO-s të hapte konsultime sipas Nenit 4 të traktatit të saj, i cili thotë se anëtarët e aleancës ushtarake perëndimore do të konsultohen së bashku sa herë që, sipas mendimit të ndonjërit prej tyre, territori, pavarësia politike ose siguria e ndonjërit prej tyre kërcënohet.
Tusk i tha Parlamentit se kishte pasur 19 ndërhyrje në hapësirën ajrore polake gjatë natës.
