Ndonëse kanë kaluar tashmë 26 vite që nga përfundimi i luftës në Kosovë, dhimbja e familjarëve që kërkojnë më të dashurit e tyre është akoma e pranishme.
Lidhur më këtë çështje sa të rëndësishme po aq të ndjeshme është prononcuar për Blic Nasim Haradinaj ish i burgosur politik njëkohësisht ish-nënkryetar i OVL-UÇK-së.
Ai tha se asnjëra nga Qeveritë e pasluftës nuk e ka marrë seriozisht fatin e të pagjeturve, duke shtuar se kjo çështje është prekur nga ata vetëm në kohë fushatash e premtimesh.
“Asnjë qeveri që nga fillimi deri në mbarim nuk është marrë seriozisht me çështjen e personave të pagjetur që është gjëja më fyese që bëhet jo vetëm familjarëve të tyre por edhe neve si popull. E para është sepse për këta vetëm politikat dhe të gjitha partitë politike e kanë keqpërdorë këtë emër duke i përmendur vetëm në fushata politike dhe në kohën e premtimeve”, shprehet ai.
Tutje, Haradinaj thotë se edhe pse pati njerëz në pozita kyqe, akoma nuk është ndërmarrë diçka konkrete.
“Unë mendoj se akti i parë më sublim i çdo kujt dhe detyrë parësore dhe njerëzore e humane është që shteti të bëjë kusht qoftë edhe dialogun, qoftë edhe Associaconin gabim e pa gabim, qoftë edhe gjykata e çdo kërkesë që bëhet nga ndërkombëtarët të jetë kushti i parë gjetja dhe zbardhja e viktimave që ende sot e kësaj dite përdoren vetëm politikisht. Ky është gabim i pafalshëm dhe gabim i cili këta i dënon që sot të kemi këtë politikë që e kemi. Prandaj sot po shkon duke u rëndu politika qoftë e qeverisë qoftë edhe e opozitës se fatkeqësisht nuk bënë asnjë send. Asnjë herë përveç që është përmend kalimthi dhe asnjëherë konkrete nuk është bërë edhe përkundër vendosjes së njerëzve në krye të pozitës që janë edhe emra të njohur që edhe vet prind i kanë aty. Unë e kuptoj që ata janë mundua me e bë të pamundurën po s’kanë pas përkrahje të qeverisë s ‘kanë pas fonde, s’kanë pasë kërkesa ultimatume as për ndërkombëtarët.”, tha Haradinaj, për Gazeta Blic.
Sipas Haradinajt, në çdo rrethanë bashkëpunimi me ndërkombëtarët gjetja e personave të zhdukur duhet të jetë kusht bisedimi.
“Serbët vendosin kushte për një dialog çfarë do qoftë ai, nëpër çdo marrëveshje ndërkombëtare. Edhe ndërkombëtarët kur vijnë në çdo marrëveshje që duhet bë me Serbinë kushti i parë duhet të jetë gjetja e viktimave, për me fillua dialogu çfarë do qoftë ai i dhimbshëm i padhembshëm e i dobishëm pastaj duhet me u marrë vesh në dialog këta por kusht me u ulën tavolinë duhet me qenë çështja e viktimave dhe e dyta çështja dhe gjendja e shqiptarëve”, përfundon ai.
