Modelja e njohur shqiptare, Emina Çunmulaj, po qëndron për një vizitë në Kosovë, ku po punon për finalizimin e një projekti në bashkëpunim me Fondacionin Jahjaga.
Gjatë vizitës së saj, ajo ka zgjedhur të ndalet edhe në Prekaz, vendin simbol të qëndresës shqiptare. Përmes postimeve në rrjetet sociale, Çunmulaj ka ndarë emocionet e saj, duke theksuar se çdo vizitë pranë varrezave të familjes Jashari mbart një peshë të thellë shpirtërore. Ajo u shpreh se kjo vizitë i rikujton sakrificën sublime të familjes Jashari për lirinë dhe dinjitetin e popullit shqiptar.
“Sa herë që kaloj nëpër Prekaz, nuk mund të kaloj kurrë pa u ndalur më parë në Memorialin e Jasharëve. Çdo vizitë mbart një peshë të thellë, duke më kujtuar sakrificën e bërë nga familja Jashari për lirinë dhe dinjitetin e popullit shqiptar. Duke ecur nëpër mjediset e memorialit, ndiej si dhembjen e thellë të humbjes ashtu edhe forcën e palëkundur të rezistencës që jeton këtu. Pavarësisht se sa herë kthehem, përvoja gjithmonë më prek në mënyra të reja – një kujtesë e fuqishme se guximi, uniteti dhe sakrifica janë themelet e lirisë sonë”, ka shkruar ajo.
