Këngëtarja e njohur shqiptare, Kanita, është rikthyer fuqishëm në skenën muzikore me projektin e saj më të ri të titulluar “Ku i le”, një këngë dinamike dhe plot energji, ideale për ditët e nxehta të verës.
E pozicionuar mes zhanreve pop dhe eurodance, “Ku i le” sjell një atmosferë ritmike dhe melodike që fton për vallëzim, me tinguj modernë dhe frymë tipike verore. Kënga kap menjëherë veshin dhe ka potencialin për t’u shndërruar në një hit të playlistave verore.
Teksti i këngës është shkruar nga Lindon Berisha, një emër tashmë i njohur për hitet që arrijnë të përçojnë emocion e energji në të njëjtën kohë. Kompozimi mban firmën e vetë Kanita Sumës në bashkëpunim me Riste Shandarov, i cili gjithashtu ka marrë përsipër edhe produksionin muzikor të këngës.
“Ku i le” dëshmon rritjen artistike të Kanitës dhe guximin e saj për të eksperimentuar me tinguj të rinj pa e humbur identitetin muzikor. Me një vokal të pastër dhe prezencë të fortë, ajo e sjell këngën me shumë stil dhe vetëbesim.
Ky projekt pritet të jetë një nga kolonat zanore të verës 2025, duke pasuruar skenën muzikore shqiptare me një tjetër këngë të freskët, që përçon vibracione pozitive dhe ndjesinë e lirisë që sjell vera. Fansat e Kanitës kanë reaguar menjëherë pozitivisht, duke e mirëpritur rikthimin e saj dhe duke ndarë këngën masivisht në rrjetet sociale.
