Presidenti ukrainas Volodymyr Zelensky falënderoi Presidentin e SHBA-së Donald Trump për “gatishmërinë e tij për të ndihmuar në mbrojtjen e jetës së popullit tonë”. Në një mesazh të botuar në X, Zelensky përsëriti se konflikti “vazhdon vetëm për shkak të Rusisë, për shkak të dëshirës së Putinit për ta zvarritur atë. Rusia po përpiqet ta bëjë këtë të duket si normaliteti i ri. Ne kurrë nuk duhet ta pranojmë këtë”. Sipas Zelensky, “duhet bërë gjithçka që është e mundur nga ana njerëzore për ta detyruar Rusinë të ndalojë vrasjet, të arrijë paqe të vërtetë dhe të sigurojë sigurinë. Paqja është e mundur vetëm përmes forcës”.
Presidenti ukrainas bëri thirrje gjithashtu që “të ndalet financimi i luftës nga Moska, duke prerë lidhjet me Iranin dhe Korenë e Veriut dhe duke ndaluar furnizimin me komponentë dhe pajisje ushtarake”. Së fundmi, Zelensky falënderoi Shtetet e Bashkuara, Gjermaninë dhe Norvegjinë për vendimet e tyre të reja në lidhje me dërgesën e sistemeve mbrojtëse Patriot dhe njoftoi se Kievi “po punon për marrëveshje të mëdha mbrojtëse me Amerikën”.
Sot, Zelensky propozoi gjithashtu që zëvendëskryeministrja Yulia Svyrydenko të drejtojë degën ekzekutive të Ukrainës. “Pata një takim me zëvendëskryeministren e parë Yulia Sviridenko. Raportuam mbi përmbushjen e marrëveshjeve me partnerët evropianë dhe amerikanë në lidhje me mbështetjen për Ukrainën, të arritura në Konferencën e mbajtur së fundmi mbi Rindërtimin e Ukrainës. Ne duhet të arrijmë gjithçka që mund të mbështesë qëndrueshmërinë e shtetit dhe shoqërisë sonë sa më shpejt të jetë e mundur”, shkroi Zelensky në kanalin e tij në Telegram.
“Ne diskutuam gjithashtu masa konkrete për të forcuar potencialin ekonomik të Ukrainës, për të zgjeruar programet e mbështetjes për ukrainasit dhe për të rritur prodhimin vendas të armëve. Me këtë qëllim, ne po fillojmë transformimin e sistemit ekzekutiv të pushtetit të Ukrainës. I kam propozuar Yulia Svyrydenko-s që ajo të udhëheqë qeverinë ukrainase dhe të përditësojë ndjeshëm punën e saj. Pres që programi i veprimit i qeverisë së re të paraqitet së shpejti”, shtoi ai.
Balkanweb
