Korporata Energjetike e Kosovës njofton se projekti kapital “Rehabilitimi dhe Modernizimi i Njësisë A3” në Termocentralin Kosova A vazhdon pa ndërprerje, pas marrjes së vendimit pozitiv nga Organi Shqyrtues i Prokurimit.
KEK-u përmes një njoftimi bën të ditur se ky projekt strategjik, i cili kishte pësuar një pezullim të përkohshëm për shkak të një ankese nga një Operator Ekonomik, ka marrë dritën e gjelbër për vazhdimësi. Më 10 korrik 2025, OSHP hodhi poshtë ankesën dhe konfirmoi ligjshmërinë dhe korrektësinë e veprimeve të KEK-ut, duke autorizuar vazhdimin e prokurimit me numër reference KEK-25-58-5-1-4.
KEK-u rithekson angazhimin e saj për një proces transparent, me integritet dhe profesionalizëm, në përputhje me standardet më të larta të prokurimit publik dhe në bashkëpunim me ekspertët vendorë dhe konsulencën e USAID.
“Në kuadër të këtij procesi, më 17.07.2025, ora 13:00, në sallën e takimeve në Termocentralin Kosova B, do të zhvillohet hapja zyrtare e aplikimeve të Operatorëve Ekonomikë përmes platformës elektronike të e-prokurimit. Ngjarja do të transmetohet drejtpërdrejt në rrjetet sociale zyrtare të KEK-ut, duke mundësuar akses të plotë për publikun”, thuhet në njoftim
Tutje KEK-u thekson se mbetet e përkushtuar që projekti A3 të përfundojë me sukses, duke garantuar konkurrencë të ndershme, transparencë dhe respektim rigoroz të ligjit, për një të ardhme energjetike më të qëndrueshme për Kosovën.
The post KEK: Projekti për rehabilitimin e Njësisë A3 ka marrë dritën e gjelbër appeared first on Kosovapost.net.
