E ardhmja e Hakan Calhanoglu mbetet rebus për Interin. Pas tensioneve të shpërthyera publikisht me Lautaro Martinez dhe deklaratave të Marottës, dialogu mes klubit dhe përfaqësuesve të mesfushorit turk është ende në pritje. Asnjë hap përpara, asnjë sqarim. Skenari ngjan gjithnjë e më shumë me një lojë të bllokuar, ku askush nuk dëshiron të zbulojë letrat i pari.
Në “sondazhet” e para të bëra nga Galatasaray përmes agjentit Gordon Stipic, Interi ka vlerësim prej 40 milionë eurosh për “regjisorin” turk, më shumë se dyfishi i 18 milionëve të arkëtuara për Brozovic në vitin 2023. Një shifër larg nga ajo që ishte imagjinuar; se me 25 milionë euro, Calhanoglu mund të largohet.
Ndërkohë, megjithatë, deklaratat e Lautaros dhe Marottës nuk kanë rritur gjasat që Gallata, gati t’i shpenzojë 15-20 milionë euro, ta rrisë ofertën. Edhe sepse në shënjestër mbetet gjithmonë Ilkay Gundogan, një alternativë që vazhdon të jetë e hapur, pavarësisht refuzimeve të marra deri tani.
Gjithsesi, përçarja nuk ka ardhur nga Calhanoglu. Asnjë kërkesë për largim, aq më pak me parametra zero. Nga Turqia, dje erdhën deklarata për t’u hedhur poshtë si të pavërteta. Mesfushori është me pushime me familjen dhe mikun e tij Kaan Ayhan, aktualisht te Galatasaray, dhe pret. Madje, të gjithë presin që dikush tjetër të bëjë lëvizjen e parë.
Interi, megjithatë, duhet të përgatitet. Mesfusha rrezikon të humbasë edhe Asllanin dhe ndoshta Frattesin. Dhe nëse Calhanoglu do të largohej vërtet, do të nevojitej një zëvendësues i denjë. Ndër emrat që ndiqen, po fiton terren Richard Ríos, për të cilin Palmeiras kërkon 30 milionë euro.
Gjysma e shumës në krahasim me Edersonin, i preferuari zikaltër, nga i cili Atalanta, ndërkohë e angazhuar në një shitje të mundshme të Retegui, nuk ka asnjë qëllim të heqë dorë. Emrat e tjerë janë Nicolò Rovella (Lazio), Angelo Stiller (Stuttgart), Morten Frendrup (Genoa) dhe Mandela Keita (Parma). Askush prej tyre nuk kushton pak.
The post Calhanoglu nuk ka kërkuar kurrë largimin, situata është në ngërç tek Interi appeared first on Telesport.
