Në emisionin “Debat Plus”, analisti politik Astrit Gashi ka komentuar situatën politike aktuale dhe përpjekjet e Lëvizjes Vetëvendosje për të çuar përpara procesin e zgjedhjes së Kryetarit të Kuvendit dhe krijimit të institucioneve paszgjedhore.
Gashi ka kujtuar krizën politike të vitit 2017, kur koalicioni PAN, ndonëse thoshte se i kishte numrat për të formuar institucionet, në realitet nuk arrinte të sigurojë shumicën në seanca. “E mbaj mend vitin 2017 ka qenë PAN-i, çdo javë i kanë pasë numrat. Kur u mblidhke Kuvendi, nuk i kishin numrat. Gjithmonë i kishin numrat, por kurrë s’i kishin numrat. Dhe kështu na patën mbajt tri muaj derisa i bënë dikur. Njëherë mezi e bënë Behgjetin, pastaj mezi e ‘blejtën’ edhe Teuta Rugovën prej LDK-së,” tha Gashi.
Sipas tij, një taktikë e ngjashme po ndodh edhe tani nga Vetëvendosje, e cila po përpiqet të krijojë bindjen se e ka shumicën, ndonëse realiteti është tjetër. “Pra dhe Albin Kurti është ka e mban temën e nxehtë në opinionin publik, edhe njerëzit e LVV tu thanë ‘i kemi numrat’ pa i pasë numrat. E vërtetë është kjo – që numrat nuk janë sot. Nëse Nisma nuk është, nuk janë numrat as nesër, dhe nëse Nisma nuk është, nuk janë numrat as pasnesër.”
Ai ka shtuar se përpjekjet e Vetëvendosjes për të kontaktuar deputetë individualisht nuk po japin efekt konkret: “Ende nuk po shihet që kanë me hy në funksion. Po i shkruajnë do statuse, po i tërheqin në gjysmë të rrugës. Qysh i kemi pa. Ramabaja, p.sh., u nxe në një status një herë, gjatë emisionit u dashtë me i ftof sepse i ndrrun fjalët”, tha Gashi.
