Bob Dylan, 83 vjeç, i rikthehet artit me një ekspozitë të re në Galerinë Halcyon në Londër, ku do të prezantojë 97 piktura të realizuara gjatë viteve 2021–2022.
Ekspozita, e titulluar “Point Blank”, përfshin vizatime të ngjyrosura që paraqesin figura njerëzore, çifte, muzikantë dhe skena të jetës së përditshme, të krijuara për të pasqyruar emocione të thella dhe histori personale.
“Synimi nuk ishte thjesht të vëzhgoja gjendjen njerëzore, por të zhytesha në të me urgjencë”, tha Dylan. Ai e përdor ngjyrën si mjet për të shprehur emocionin dhe për të rrëfyer histori, shkruan DailyMail.
Drejtuesit e galerisë përshkruajnë veprat si dritare në imagjinatën e një prej tregimtarëve më të mëdhenj të kohës sonë.
Kjo nuk është hera e parë që Dylan ekspozon në Halcyon – ai më parë prezantoi edhe serinë “Drawn Blank”, vizatime të krijuara gjatë turneve të tij në vitet 1989–1992.
Përveç kontributit të tij në artin vizual, Dylan mbetet një nga figurat më të rëndësishme të muzikës bashkëkohore.
Ai ka fituar Çmimin Nobel për Letërsi, 10 çmime Grammy dhe është anëtar i Rock and Roll Hall of Fame.
Këngët e tij janë interpretuar nga emra të mëdhenj si Jimi Hendrix, The Byrds dhe Adele.
Ekspozita “Point Blank” hapet më 9 maj dhe hyrja është falas.
