Anëtarët e bordit të Teslas thuhet se kanë filluar një kërkim për dikë që të zëvendësojë Elon Musk si CEO.
Disa firma kërkimore ekzekutive u afruan për të gjetur një pasardhës rreth një muaj më parë, raportoi Wall Street Journal.
Por statusi aktual i planifikimit të vazhdimësisë për prodhuesin e veturave elektrike nuk dihej.
Kryetarja e Tesla-s, Robyn Denholm, më vonë reagoi ndaj raportit duke këmbëngulur se çdo sugjerim për një kërkim aktiv ishte “absolutisht i rremë”.
Ajo shtoi se bordi ishte shumë i sigurt në aftësinë e Musk për të vazhduar “ekzekutimin e planit të rritjes përpara”.
Bëhet e ditur se aksionet e Tesla-s kanë rënë ndjeshëm mes një reagimi publik mbi rolin e Musk në qeverinë e Donald Trump, shkruan skynews, përcjell Telegrafi.
Ai zotëron pak më pak se 13% të aksioneve të Tesla-s dhe është aksionari më i madh.
Njeriu më i pasur në botë ka drejtuar Departamentin e Efikasitetit të Qeverisë (DOGE), ku ka mbikëqyrur shkarkimin e dhjetëra mijëra punonjësve të qeverisë.
Ai gjithashtu ka mbështetur partitë e ekstremit të djathtë në Evropë, gjë që ka çuar në protesta kundër Musk dhe Tesla, të cilat kanë parë dyqanet e saj dhe stacionet e karikimit të vandalizuara në të gjithë SHBA dhe Evropë.
Presidenti Trump i ka etiketuar vandalët “terroristë”.
Ndryshe, kjo vjen pasi Musk tha se koha që ai kalon me DOGE do të “ulej ndjeshëm” nga maji dhe ai do t’i kushtojë më shumë kohë drejtimit të kompanive të tij, si Tesla, SpaceX dhe X.
Anëtarët e bordit u takuan me Musk dhe i kërkuan që të njoftonte publikisht se do të kalonte më shumë kohë në Tesla, thuhet në raport.
