Baza detare Ream, e ndërtuar fillimisht me financimin e SHBA-ve, është rinovuar nga Kina për tre vjet.
Kamboxhia inauguroi të shtunën e 5 prillit një bazë detare të rinovuar nga Kina, por kjo e fundit nuk do të ketë përdorimin “ekskluziv” të saj, siguruan autoritetet vendase.
Kjo, pasi Washington-i zyrtar shqetësohet për ndikimin në rritje të Pekin-it në rajon.
Një delegacion ushtarak kinez ishte i pranishëm në ceremoni, si dhe përfaqësues të ushtrive të huaja, vuri në dukje agjencia AFP.
“Nuk ka asgjë për të fshehur” në lidhje me këtë bazë detare, e vendosur në Ream (jugperëndim), pohoi kryeministri kamboxhian Hun Manet gjatë një fjalimi, duke specifikuar se atje mund të ankorohen anije nga shtete të tjera.
Objekti nuk u rinovua për përdorim “ekskluziv” të Pekin-it, siguroi ai.
Washington-i druhet se kjo bazë, me pamje nga Gjiri i Tajlandës, i ofron Pekin-it një pozicion strategjik në portën e detit fqinj të Kinës Jugore, të cilin gjiganti aziatik e pretendon pothuajse tërësisht.
Cao Qingfeng, një zyrtar ushtarak kinez, e prezantoi këtë port si një simbol të “miqësisë së pathyeshme” kino-kamboxhiane, duke shtuar se do të përdoret gjatë stërvitjeve të përbashkëta ushtarake, përfshirë manovrat “Golden Dragon” të planifikuara për në maj.
Phnom Penh është një aleat i vjetër i Pekin-it.
Nën Hun Sen, babain e Hun Manet, i cili sundoi Kamboxhian me një dorë të hekurt për gati 40 vjet, Kina investoi miliarda dollarë në infrastrukturën e partnerit të saj, duke përfituar nga një përkeqësim i marrëdhënieve midis kësaj të fundit dhe Washington-it në vitet e fundit.
Që nga viti 2022, ekonomia e dytë më e madhe në botë ka kontribuar në rinovimin e bazës detare Ream, e ndërtuar fillimisht me fondet e SHBA-ve.
