Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen raste ku viktima zakonisht janë gratë dhe vajzat që përjetojnë dhune psikike e fizike nga bashkëshortët e tyre, por edhe anëtarët tjerë të familjes.
Një rast i dhunës në familje është raportuar së fundmi në Malishevë, ku një i ri është arrestuar pasi dyshohet se ka shpërndarë video intime të ish-bashkëshortes së tij me qëllim që t’ia prishë fejesën.
Burimet e Sinjalit bëjnë të ditur se viktima (rreth 19-vjeçare) e ka njoftuar Policinë më 31 mars 2025, se ish-bashkëshorti i saj (rreth 22-vjeçar), e ka kanosur përmes rrjeteve sociale dhe i ka dërguar disa video intime.
Fillimisht, rasti është trajtuar nga Policia në Podujevë, pasi viktima ndodhej në shtëpinë e të fejuarit të saj në fshatin Sfeqel, por për shkak të kompetencave territoriale, hetimet janë bartur në Malishevë.
Policia ka arritur ta sigurojë prezencën e të dyshuarit, i cili gjatë deklaratës së tij ka pranuar se i kishte shkruar viktimës në WhatsApp dhe i kishte dërguar një video intime, por ka mohuar se e ka kanosur.
Sipas tij, ai e kishte dërguar videon pasi kishte mësuar se ish-bashkëshortja ishte fejuar dhe kishte dashur ta prishte fejesën e saj.
Me urdhër të Prokurorit, i dyshuari është ndaluar për 48-orë, ndërsa rasti po hetohet nga organet kompetente.
