“Megjithatë Hamas-i propozoi planin e tij”, shtoi i dërguari amerikan.
I dërguari i SHBA-ve për Lindjen e Mesme, Steve Witkoff zbuloi të dielën se negociatat e fundit me Hamas-in mbi një plan rindërtimi për Rripin e Gazës “përfunduan keq”, ndërsa bisedimet indirekte të armëpushimit vazhdojnë në Doha.
Këto, në një përpjekje për të kapërcyer dallimet e thella mbi mënyrën se si të vazhdohet me armëpushimin e brishtë në enklavën palestineze.
Armëpushimi hyri në fuqi më 19 janar, pas pesëmbëdhjetë muajsh të një lufte shkatërruese në Gaza, të shkaktuar nga një sulm i paprecedentë i lëvizjes islamiste palestineze kundër Izraelit më 7 tetor 2023.
Negociatorët izraelitë janë gjithashtu në Egjipt, ku po diskutojnë me ndërmjetësit egjiptianë mbi çështjen e pengjeve izraelite, njoftoi të dielën zyra e ministrit Netanyahu.
“Përvoja e fundit e samitit arab dhe përgjigja e Hamas-it nuk kanë qenë inkurajuese”, tha Steve Witkoff, sipas të përditshmes izraelite Haaretz.
Duke folur në programin Face the Nation të CBS, i dërguari i SHBA-ve tha se kishte “paraqitur një propozim të arsyeshëm tranzicioni, i cili do të kishte përfshirë një formë të çmilitarizimit të Hamas-it dhe që, ndoshta, mund të kishte hapur rrugën për një zgjidhje të qëndrueshme paqeje”.
“Megjithatë Hamas-i propozoi planin e tij”, shtoi i dërguari amerikan. “Dhe në thelb hodhi poshtë atë që kishim diskutuar. Është një fund mjaft i dobët”.
“Ne jemi duke eksploruar të gjitha alternativat dhe opsionet që mund të ofrojnë një jetë më të mirë për popullin e Gazës dhe popullin izraelit”, tha ai. “Shpresoj që ta rimendojnë, sepse alternativa nuk është shumë e favorshme për ta”.
AFP-ja shkruan duke cituar një burim të afërt me negociatat, se një delegacion i Hamas-it i kryesuar nga Khalil al-Hayya u largua nga Cairo të dielën për në Doha, e cila pret zyrën politike të lëvizjes islamiste.
