Kryeministri në detyrë, Albin Kurti, shpërfilli urdhrin e gjykatës për t’u paraqitur në Prokurorinë Speciale për të dhënë dëshminë e tij lidhur me rastin e rezervave shtetërore.
Shpërfilljen e zgjodhi ta bëjë në publik nga Gjilani ku shkoi për të hedhur gurthemelin e një çerdheje dhe për të ridërguar mesazhin Prokurorisë Speciale se për ta marrë dëshminë e tij duhet t’i shkojnë në zyre. Ky veprim i Kurtit ndeshi në reagime të misioneve të huaja në vend që i kujtuan Kurtit të bëhet më i vëmendshëm për gurthemelin e shtetit ligjor – pavarësinë e gjyqësorit e prokurorisë.
Ambasada gjermane në Kosovë në një përgjigje për express tha se pret që sundimi i ligjit dhe procedurat të respektohen nga të gjithë.
“Jemi plotësisht dakord me deklaratat e bëra nga misionet e tjera. Ne presim që të respektohet plotësisht sundimi i ligjit dhe të respektohen procedurat dhe proceset përkatëse nga të gjithë”, tha zëdhënësi i ambasadës, Christian Böttcher.
Përveçse nuk u paraqit në Prokurorinë Speciale në Prishtinë, Kurti para gazetarëve në Gjilan e sulmoi atë.
“Shtrohet pyetja pse i humb prokuroria tre muaj. Për shkak se është më shumë e interesuar të mbushë ballinat e ndonjë portali të oligarkut sesa të sjellë drejtësi. Kurrë prokuroria e shtetit nuk ka qenë më e lirë për të vepruar. Fatkeqësisht lirinë po e përdorë, po e keqpërdorë për ta luftuar qeverinë dhe jo krimin e korrupsionit”, tha Kurti, duke insistuar se nuk po refuzon të japë dëshminë, por se ajo duhet të bëhet në zyrën e tij.
Për këtë mosbindje të Kurtit reagoi Zyra e BE-së në Kosovë, e cila në një përgjigje më herët për express theksoi se pavarësia e gjyqësorit duhet të respektohet.
“Pavarësia e gjyqësorit dhe prokurorisë është gurthemeli i shtetit ligjor dhe duhet respektuar në çdo kohë. Gjyqësori dhe prokuroria në një sistem demokratik mund të jenë subjekt i shqyrtimit publik dhe debatit politik”.
Duke mos e përmendur kryeministrin, Zyra e BE-së gjithashtu kërkoi të promovim të llogaridhënies e integritet.
“Përderisa ka arsye për të diskutuar përmirësimet në sistemin e drejtësisë në Kosovë, të gjitha kritikat duhet të jenë të balancuara, duke synuar promovimin e llogaridhënies, integritetit dhe efikasitetit të sistemit të drejtësisë. Në parim, ne nuk komentojmë hetimet në vazhdim apo procedimet gjyqësore. Ne presim që çdo proces gjyqësor të jetë i drejtë dhe proporcional, duke balancuar interesat përkatëse”.
Edhe ambasada e Mbretërisë së Bashkuar kërkoi respektim të sundimit të ligjit.
“Respekti për sundimin e ligjit është një tipar kryesor i demokracisë së Kosovës. Ne kërkojmë nga ata që janë të përfshirë në këtë rast që të veprojnë në përputhje me Kushtetutën e Kosovës dhe në respekt të proceseve ligjore dhe të punojnë në atë që është interesi më i mirë i Kosovës”, kishte thënë dje ambasada britanike për express.
Gjykata Themelore në Prishtinë para disa ditësh lëshoi urdhër që e obligon Kurtin të japë dëshminë e tij në cilësinë e dëshmitarit, në një rast që ka të bëjë me dyshimet për keqpërdorime me rezervat shtetërore.
Urdhri erdhi pasi kryeministri nuk u është përgjigjur dy ftesave që ia ka bërë Prokuroria në muajt e fundit.
Ndërkohë, Zyra e Kurtit i kishte dërguar letër Gjykatës Themelore me kërkesën për ta urdhëruar Prokurorinë që ta marrë dëshminë e Kurtit në Kryeministri.
Gjithë refuzimin për të shkuar në Prokurorinë Speciale Kurti po e bën me arsyetimin se nuk dëshiron të bëhet “lajm botëror” dhe se mund të prezantohet si rast korrupsioni.
Sidoqoftë, Kurti të martën zuri vend në disa media botërore për refuzimin e tij për t’iu përgjigjur urdhrit të gjykatës për dëshmi në prokurori.
