U kundërshtua shumë, por gjithçka u konfirmua të martën. Shqipëria dhe Serbia do të organizojnë së bashku Kampionatin Evropian për U21 në vitin 2027.
Kjo u vendos në mbledhjen e Komitetit Ekzekutiv të UEFA-s.
Ndeshja hapëse do të zhvillohet në stadiumin “Karagjorgje” në Novi Sad. Ndërsa, finalja në “Air Albania” në Tiranë.
Ndeshjet do të zhvillohen edhe në Shkodër, Durrës e Elbasan. Kurse, në Serbi do të luhen edhe në Leskovc, Loznicë e Zajeçar.
Kandidatura e dy shteteve ishte e vetmja që ka qenë brenda afatave. Belgjika dhe Turqia kishin shprehur interesim në të kaluarën, por nuk kishin aplikuar me kohë.
Ideja e organizimit të Evropianit për 21-vjeçarët nga FSHF dhe federata serbe është kritikuar ashpër në Shqipëri e sidomos në Kosovë.
Presidenti i FSHF-së, Armand Duka, e ka mbrojtur këtë vendim. Ai e ka cilësuar si mesazh paqeje dhe bashkëpunimi.
Shqipëria dhe Serbia, si vende organizatore, do ta fitojnë të drejtën e kualifikimit direkt në këtë Evropian.
