“A thua pse qeveritë e kaluara nuk kanë blerë armatim për ushtrinë? Ose s’kanë dashtë ose s’ua kanë shitë (perëndimorët)”.
Kjo është gënjeshtra e radhës nga kandidati për kryeministër i Lëvizjes Vetëvendosje, Albin Kurti para qindra simpatizantëve të Lëvizjes Vetëvendosje, e thënë para qindra mbështetësve të këtij subjekti politik gjatë një tubimi elektoral për zgjedhjet e 9 shkurtit, shkruan Demokracia.com.
Gënjeshtra si kjo e thënë nga Kurti më 29 janar 2025 janë lehtësisht të demantueshme. Mjafton që të shikohen ligjet mbi të cilat mbështetej funksionimi i FSK-së dhe të cilat janë hartuar me mbështetjen dhe dakordimin e Shteteve të Bashkuara të Amerikës dhe NATO-s.
Pa një bazë ligjore, e cila do të mbështetej nga shtetet perëndimore, as furnizimi me armatime i FSK-së nuk do të ishte i mundur.
Por, Kurti, i cili shquhet sulme ndaj kundërshtarëve politik përmes gënjeshtrave dhe manipulimeve, bëhet sikur nuk e di se kalimi i Forcës së Sigurisë së Kosovës në ushtri në vitin 2018/19 nuk është një proces që ka ndodhur brenda një ditë.
Rrënjët e kësaj historie janë në Ushtrinë Çlirimtare të Kosovës, të cilat pas përfundimit të luftës u shndërruan në Trupa Mbrojtëse të Kosovës dhe këto të fundit në Forcën e Sigurisë së Kosovës pas shpalljes së pavarësisë së Kosovës në vitin 2008.
Por, në këtë histori shtetndërtuese, Kurti ishte duke brohoritur parrullat politike kundër hapave që po bënte Kosova dhe klasa e saj politike.
Janë të njohura deklaratat e tij kur Kosova po përmbyllte mbikëqyrjen e pavarsisë ndërkombëtare në vitin 2012 se “Kosova nuk do të ketë ushtri” dhe ato të mëvonshme, si ajo e vitit 2017 se “FSK-ja nuk plotëson as figurën e një xhandarmërie se lëre më të jetë Ushtri”.
Klasa politike e Kosovës ka ndjekur me kujdes këshillat e shteteve aleate, Shteteve të Bashkuara të Amerikës, Bashkimit Evropian dhe NATO-s edhe për rrugën që duhej të ndiqte deri në aftësimin e plotë që FSK-ja të shndërrohej në ushtri.
Baza ligjore mbi të cilën mbështetej funksionimi i FSK-së ishte hartuar me mbështetjen e ekspertëve të shteteve aleate.
2008 – LIGJI PËR FSK: NUK DO TË KETË ARMË TË RËNDA
Ligji Nr. 03/L-046 për FSK-në i qershorit të vitit 2008 është ligj i miratuar në kuadër të një pakoje të gjerë të ligjeve të miratuara pas hyrjes në fuqi të Kushtetutës së Kosovës, vetëm 4 muaj pas shpalljes së pavarësisë së Kosovës.
Edhe misioni dhe mandati i atëhershëm i FSK-së do të ishte i kufizuar për faktin se Kosova nuk ekzistonte më parë si shtet dhe nuk kishte pasur kurrë ushtrinë e saj shtetërore.
Në nenin 10 të këtij ligji qartësohej se “Forca e Sigurisë së Kosovës është e armatosur lehtë dhe nuk do të ketë armë të rënda, siç janë tanket, artileria e rëndë apo kapacitete sulmuese ajrore”.
Pra, kjo është një dëshmi e mjaftueshme për të hedhur poshtë gënjeshtrat që kryeministri Kurti i prodhon çdo ditë në mungesë të punëve konkrete për t’i prezantuar pas 4 vitesh të kaluara në Qeveri.
2018/19 – LIGJI PËR FSK: DO TË JETË E PAJISUR ME ARMË DHE SISTEME TË ARMATIMIT NË PËRPUTHJE ME NEVOJAT
Forca e Sigurisë së Kosovës do të duhej të kalonte nëpër një “plan tranzicioni” për të arritur që të shndërrohej në ushtri të rregullt.
Kjo rrugë, gati 10 vjeçare, është bërë me mbështetjen e madhe të Shteteve të Bashkuara të Amerikës dhe NATO-s.
Më 14 dhjetor të vitit 2018, Kuvendi i Kosovës ka miratuar pakon ligjore përmes së cilave, Forca e Sigurisë së Kosovës ndryshoi statusin e saj në Ushtri e Kosovës.
Sipas nenit (kompetencat dhe detyrat) 4 të Ligjit nr. 06/L-123 për Forcën e Sigurisë së Kosovës “Forca e Sigurisë së Kosovës mbron sovranitetin dhe integritetin territorial, qytetarët, pronën dhe ineresat e Republikës së Kosovës” dhe se pjesë e detyrave të përgjithshme është “Mbrojtja e sovranitetit dhe integritetit territorial të Republikës së Kosovës”.
Sipas të njejtit nen, përcaktohet qartë se FSK është “forcë ushtarake”, “e armatosur”, kurse sipas nenit 7 (armatimi) thuhet edhe më qartë se “FSK do të jetë e pajisur me armë dhe sisteme të armatimit, në përputhje me nevojat e FSK së, për përmbushjen e kompetencave dhe detyrave të saj”.
Para shndërrimit të FSK-së në Ushtri, Sekretari i përgjithshëm i NATO-s, Anders Fogh Rasmussen, kishte kumtuar vlerësimin e Këshillit të aleancës se Forca e Sigurisë së Kosovës ka përmbushur kapacitetet e saj operacionale dhe është plotësisht e aftësuar që të përmbushë detyrat e caktuara nga mandati i saj në bazë të standardeve të përcaktuara nga NATO-ja.
Vlerësimi i NATO-s ishte pritur me entuziazëm të lartë në Kosovë, pasi në këtë mënyrë po hapeshin dyertë që FSK-ja të bëhet Ushtria e ardhshme e Kosovës.
Në atë kohë, kryeministri i Kosovës, Hashim Thaçi vlerësonte se deklarimi i NATO-s “është jashtëzakonisht i rëndësishëm për ne, është një kapitull i ri për zhvillimin e FSK-së, sepse Kosova ndan vizionin e NATO-s për një të ardhme ku Ballkani perëndimor është i integruar në strukturat euroatlantike. Pra, është kapitulli i avancimit të FSK-së. Gjithashtu, dua të theksoj se Forca e Sigurisë së Kosovës është një forcë që është ndërtuar nga zeroja, duke i përmbushur standardet më të larta të NATO-s, dhe duke bashkëpunuar ngushtë me ekipin e NATO-s në kuadër të FSK-së”. / Demokracia.com /
