I ashtuquajturi drejtori i Zyrës për Kosovë, Petar Petkoviq, duke komentuar vendimin e këshilltarëve shqiptarë në Kuvendin e Mitrovicës së Veriut për hapjen e urës në Ibër, vlerësoi se “Albin Kurti sot ka treguar pa mëdyshje se ëndërron për luftë dhe dëshira e tij për ta futur në konflikte gjithë veriun e Kosovës është e madhe”.
Siç thuhet në njoftimin e të ashtuquajturës zyra për Kosovë, Petkoviq ka thënë se Kurti “sot ka urdhëruar këshilltaren e tij Aida Ferati që në seancën e Kuvendit Komunal në veri të Mitrovicës ta përfshijë pikën e rendit të ditës për hapjen e urës së Ibrit që ndan pjesët veriore dhe jugore të qytetit dhe që paraqet një mburojë të rëndësishme të sigurisë për serbët në Kosovë”.
“Qëllimi i kësaj lëvizjeje të njëanshme dhe të paligjshme të Kurtit është që të çojë në tensione dhe provokime të reja në kurriz të popullit paqësor serb në veri të Kosovës. Për këtë ai përdor përfaqësuesit dhe këshilltarët e tij. Për këtë vendim votuan 11 këshilltarë, një abstenoi dhe një votë ishte kundër”, ka deklaruar Petkoviq.
Petkoviq ka theksuar se “hapja e urës së Ibrit është pjesë e dialogut mes Beogradit dhe Prishtinës, e jo Gauleiter ilegal i Kurtit”.
“Menjëherë i kam njoftuar të gjithë përfaqësuesit ndërkombëtarë, si dhe ndërmjetësuesin në dialog, Miroslav Lajçak, për këtë lëvizje të fundit luftarake të Kurtit dhe presim që ata të qetësohen dhe të frenojnë Kurtin, i cili po bën gjithçka për të shpëtuar nga obligimi për formimin e Asociacionit të Komunave me shumicë serbe dhe prishjen e dialogut në Bruksel më 2 maj. Nuk ka përparim e as normalizim të marrëdhënieve përderisa Kurti bën lëvizje të tilla të njëanshme, me të cilat dëshiron të fusë të gjithë veriun e Kosovës në luftë, dhe i takon perëndimit të parandalojë lëvizje të tilla nga Kosova”, theksoi Petkoviq.
