Dhoma e Ulët e Parlamentit të Austrisë miratoi një projekt-ligj që e bën të detyrueshme vaksinimin kundër COVID-19 për të rriturit që nga 1 shkurti.
E përballur me një rritje të infeksioneve, qeveria tha në nëntor se po planifikonte mandatin. Që atëherë ajo ka rritur moshën nga e cila do të zbatohet mandati, nga 14 në 18.
Afërsisht 72% e popullsisë së Austrisë është plotësisht e vaksinuar kundër COVID-19, një nga normat më të ulëta në Evropën Perëndimore. Pas përfundimit të një bllokimi të katërt kombëtar muajin e kaluar, varianti jashtëzakonisht ngjitës Omicron i ka shtyrë infeksionet në nivele rekord, por qeveria dëshiron të shmangë një tjetër bllokim.
“Të bësh të detyrueshëm vaksinimin kundër COVID-19 është një dalje urgjente… nga kufizimet e vazhdueshme ndaj të drejtave tona personale dhe themelore si ato që na është dashur të durojmë në dy vitet e fundit,” tha kryetarja e opozitës Socialdemokrate, Pamela Rendi.
Projekt-ligji imponon gjoba deri në 600 euro (680 dollarë) pasi të fillojnë kontrollet më 15 mars. Ata që kundërshtojnë atë gjobë fillestare do përballen me një gjobë maksimale prej 3,600 euro.
Italia i ka bërë të detyrueshme vaksinat kundër COVID-19 për ata të moshës 50 vjeç e lart, ndërsa Greqia ka bërë të njëjtën gjë për mbi 60 vjeç dhe vende të ndryshme evropiane e kanë bërë këtë për disa profesione si personeli mjekësor.
