Sot janë bërë 9 vjet që kur Kosova është anëtarësuar në UEFA, duke u bërë kështu anëtarja e 55-të e kësaj organizate evropiane të futbollit.
Me 28 vota pro, 24 kundër dhe dy abstenime në kongresin e UEFA-s në Budapest, më 3 maj 2016, Kosova u pranua si anëtare me të drejta të plota në UEFA.
Për ish-legjendën e futbollit, në atë kohë kreu i FFK-së, Fadil Vokrri, pranimi i Kosovës në UEFA ishte drejtësi e vonuar.
“Një drejtësi e vonuar, por, duke marrë parasysh bllokadat ligjore që i janë paraqitur Kosovës ne arritëm të pranohemi, kjo është një arritur e jashtëzakonshme. Momentet brenda kuvendit të UEFA-as, ishin të vështira për shkak të kahjes që i dhanë kuvendit disa shtete. Megjithatë ne arritën të anëtarësohemi në UEFA dhe tash është radha të anëtarësohemi në kongresin e FIFA-as në Meksikë që zhvillohet javën e ardhshme. Edhe në këtë kuvend, pranimi i Kosovës ose jo është në rend dite. Pra kjo është një fitore e të gjithëve”, kishte deklaruar Vokrri.
Kujtojmë se kundër anëtarësimit të Kosovës në UEFA ishte Serbia. /Klankosova.tv
