29 vjet nga masakra në Srebrenicë, Kosova përkujton viktimat e gjenocidit

Bosnja e Hercegovina sot shënon 29 vjetorin e masakrës së Srebrenicës. Kjo masakër është më e rënda në Evropë që nga Lufta e Dytë Botërore.

Qeveria e Kosovës gjatë ditës së djeshme ka shpallur edhe zyrtarisht 11 korrikun Ditë Përkujtimi për gjenocidin në Srebrenicë.

Në mbledhjen e Qeverisë kryeministri i Kosovës, Albin Kurti ka thënë se shpallja e 11 korrikut si Ditë Përkujtimi për gjenocidin në Srebrenicë është veprim fisnik e i duhur në emër të Kosovës.

“Ky është veprim finsik e i duhur në emër të Kosovës, të universales tonë njerëzore, e të dëshirës sonë për drejtësi dhe paqe. Që të mos harrohet dhe të mos përsëritet më gjenocidi as në Bosnjë dhe Hercegovinë, as në Kosovë, e askund tjetër në rajonin tonë dhe në botë”, theksoi Kurti.

Ndërkaq, Kuvendi i Kosovës sot do të mbajë seancë të jashtëzakonshme për të përkujtuar viktimat e gjenocidit në Srebrenicë.

Kombet e Bashkuara (OKB) në maj të këtij viti ka miratuar rezolutën që përcakton 11 korrikun si Dita e përkujtimit të gjenocidit të Srebrenicës, me mbështetjen dërrmuese të Asamblesë së Përgjithshme të OKB-së.

Duke dënuar mohimin e gjenocidit të Srebrenicës, rezoluta denoncoi glorifikimin e krimeve kundër njerëzimit, gjenocidit dhe kriminelëve të luftës.

Miratimi i rezolutës u kundërshtua më së shumti nga Serbia dhe Rusia.

Gjykata Ndërkombëtare e Drejtësisë në Hagë e karakterizoi krimin në Srebrenicë si gjenocid në vitin 2007. Beogradi zyrtar dhe autoritetet e entitetit serb të Bosnjë e Hercegovinës, Republika Sërpska, e mohojnë gjenocidin.

Në korrik të vitit 1995, forcat serbe të Bosnjës vranë mbi 8 mijë burra dhe djem myslimanë në enklavën e Srebrenicës, që ishte caktuar si “vend i sigurt” nga Kombet e Bashkuara.

Çdo vit më 11 korrik, eshtrat e atyre që identifikohen gjatë vitit të fundit varrosen në Qendrën përkujtimore të Potoçari.

Related Posts